ਸੰਯੁਕਤ ਰਾਸ਼ਟਰ/ਏ.ਟੀ.ਨਿਊਜ਼:
ਟਰੰਪ ਪ੍ਰਸ਼ਾਸਨ ਵੱਲੋਂ ਸ਼ੁਰੂ ਕੀਤੀਆਂ ਗਈਆਂ ਟੈਰਿਫ਼ ਜੰਗਾਂ ਦੇ ਪਿਛੋਕੜ ਵਿੱਚ ਸੰਯੁਕਤ ਰਾਸ਼ਟਰ ਦੇ ਸਕੱਤਰ ਜਨਰਲ ਅੰਤੋਨੀਓ ਗੁਟੇਰੇਜ਼ ਨੇ ਚਿਤਾਵਨੀ ਦਿੱਤੀ ਹੈ ਕਿ ਜਦੋਂ ਦੇਸ਼ ਵਪਾਰਕ ਜੰਗ ਵਿੱਚ ਕੁੱਦਣਗੇ ਤਾਂ ਸਭ ਕੁਝ ਗੁਆ ਦੇਣਗੇ। ਗੁਟੇਰੇਜ਼ ਨੇ ਇੱਥੇ ਕਿਹਾ, ‘‘ਮੈਨੂੰ ਲੱਗਦਾ ਹੈ ਕਿ ਅਸੀਂ ਇੱਕ ਆਲਮੀ ਅਰਥਚਾਰੇ ਵਿੱਚ ਰਹਿੰਦੇ ਹਾਂ। ਸਭ ਕੁਝ ਆਪਸ ਵਿੱਚ ਜੁੜਿਆ ਹੋਇਆ ਹੈ ਅਤੇ ਜ਼ਾਹਿਰ ਹੈ ਕਿ ਮੁਕਤ ਵਪਾਰ ਦੀ ਸਥਿਤੀ ਸਾਰੇ ਦੇਸ਼ਾਂ ਲਈ ਫ਼ਾਇਦੇਮੰਦ ਹੋਵੇਗੀ, ਜਦੋਂ ਅਸੀਂ ਵਪਾਰਕ ਜੰਗ ਵਿੱਚ ਕੁੱਦਾਂਗੇ ਤਾਂ ਮੇਰਾ ਮੰਨਣਾ ਹੈ ਕਿ ਸਭ ਕੁਝ ਗੁਆ ਦੇਵਾਂਗੇ।’’ ਉਹ ਵਧਦੀ ਆਲਮੀ ਵਪਾਰਕ ਜੰਗ ਬਾਰੇ ਇੱਕ ਸਵਾਲ ਦਾ ਜਵਾਬ ਦੇ ਰਹੇ ਸਨ।
ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਵ੍ਹਾਈਟ ਹਾਊਸ ਵਿੱਚ ਆਪਣੇ ਦੂਜੇ ਕਾਰਜਕਾਲ ਦੌਰਾਨ ਕਿਹਾ ਹੈ ਕਿ ਅਮਰੀਕਾ ਉਨ੍ਹਾਂ ਦੇਸ਼ਾਂ ’ਤੇ ਮੋੜਵੇਂ ਟੈਕਸ ਲਗਾਏਗਾ ਜਿਹੜੇ ਅਮਰੀਕੀ ਵਸਤਾਂ ’ਤੇ ਮੋਟੇ ਟੈਕਸ ਲਗਾਉਂਦੇ ਹਨ। ਟਰੰਪ ਦਾ ਕਹਿਣਾ ਹੈ, ‘‘ਅਮਰੀਕਾ ਸੈਂਕੜੇ ਅਰਬ ਡਾਲਰ ਦਾ ਟੈਕਸ ਲੈਣ ਜਾ ਰਿਹਾ ਹੈ ਅਤੇ ਅਸੀਂ ਐਨੇ ਅਮੀਰ ਹੋ ਜਾਵਾਂਗੇ ਕਿ ਤੁਹਾਨੂੰ ਪਤਾ ਹੀ ਨਹੀਂ ਲੱਗੇਗਾ ਕਿ ਐਨਾ ਸਾਰਾ ਪੈਸਾ ਕਿੱਥੇ ਖਰਚ ਕਰਨਾ ਹੈ।’’
