ਸੈਕਰਾਮੈਂਟੋ, ਕੈਲੀਫ਼ੋਰਨੀਆ/ ਹੁਸਨ ਲੜੋਆ ਬੰਗਾ : ਫ਼ਲੋਰਿਡਾ ਦੇ ਇੱਕ ਵਿਅਕਤੀ, ਜਿਸ ਨੂੰ ਆਪਣੀ ਗਵਾਂਢਣ ਨਾਲ ਜਬਰ ਜ਼ਨਾਹ ਕਰਨ ਉਪਰੰਤ ਹੱਤਿਆ ਕਰਨ ਦੇ ਮਾਮਲੇ ਵਿੱਚ ਮੌਤ ਦੀ ਸਜ਼ਾ ਹੋਈ ਸੀ, ਨੂੰ ਪਿਛਲੇ ਦਿਨੀਂ ਜ਼ਹਿਰ ਦਾ ਟੀਕਾ ਲਾ ਦਿੱਤਾ ਗਿਆ ਜਿਸ ਦੇ ਕੁਝ ਮਿੰਟਾਂ ਬਾਅਦ ਉਸ ਦੀ ਮੌਤ ਹੋ ਗਈ। ਰਿਪਬਲੀਕਨ ਗਵਰਨਰ ਰੋਨ ਡੇਸੈਂਟਿਸ ਦੇ ਦਫ਼ਤਰ ਅਨੁਸਾਰ ਨਾਰਮੈਨ ਮੀਅਰਲ ਗ੍ਰਿਮ ਜੁਨੀਅਰ ਨੂੰ ਫ਼ਲੋਰਿਡਾ ਸਟੇਟ ਜੇਲ ਵਿੱਚ ਮੌਤ ਦਿੱਤੀ ਗਈ। ਉਸ ਨੂੰ ਸ਼ਾਮ 6.15 ਵਜੇ ਮ੍ਰਿਤਕ ਐਲਾਨ ਦਿੱਤਾ ਗਿਆ। ਅਦਾਲਤੀ ਰਿਕਾਰਡ ਅਨੁਸਾਰ ਗ੍ਰਿਮ ਨੇ ਸਿੰਥੀਆ ਕੈਂਪਬੈਲ ਨਾਮੀ ਔਰਤ ਦੀ ਬੁਰੀ ਤਰ੍ਹਾਂ ਹੱਤਿਆ ਕਰ ਦਿੱਤੀ ਸੀ। ਜੁਲਾਈ 1998 ਵਿੱਚ ਸਿੰਥੀਆ ਲਾਪਤਾ ਹੋ ਗਈ ਸੀ। ਬਾਅਦ ਵਿੱਚ ਉਸ ਦੀ ਲਾਸ਼ ਪੈਨਸਾਕੋਲਾ ਬੇਅ ਬਰਿਜ ਨੇੜੇ ਪਾਣੀ ਵਿਚੋਂ ਮਿਲੀ ਸੀ। ਉਸ ਦੇ ਚਿਹਰੇ ਤੇ ਸਿਰ ਵਿੱਚ ਡੂੰਘੀਆਂ ਸੱਟਾਂ ਮਾਰੀਆਂ ਗਈਆਂ ਸਨ। ਉਸ ੳੁੱਪਰ ਹਥੌੜੇ ਨਾਲ ਵਾਰ ਕੀਤਾ ਗਿਆ ਸੀ। ਪੋਸਟ ਮਾਰਟਮ ਰਿਪੋਰਟ ਅਨੁਸਾਰ ਉਸ ਦੀ ਛਾਤੀ ’ਤੇ 11 ਚਾਕੂਆਂ ਦੇ ਜ਼ਖ਼ਮ ਸਨ ਜਿਨਾਂ ਵਿਚੋਂ 7 ਜ਼ਖ਼ਮ ਇਕੱਲੇ ਦਿੱਲ ਉਪਰ ਪਾਏ ਗਏ ਸਨ। ਹੋਰ ਸਬੂਤਾਂ ਤੋਂ ਇਲਾਵਾ ਗ੍ਰਿਮ ਨੂੰ ਡੀ. ਐਨ. ਏ. ਟੈਸਟ ਵਿੱਚ ਵੀ ਦੋਸ਼ੀ ਪਾਇਆ ਗਿਆ ਸੀ।
