ਬਘੇਲ ਸਿੰਘ ਧਾਲੀਵਾਲ :
ਭਗਵੰਤ ਸਿਆਂ,ਤੁਹਾਡੀ ਦ੍ਰਿੜਤਾ ਅਤੇ ਇਰਾਦਿਆਂ ਦੀ ਪਵਿੱਤਰਤਾ ਹੀ ਪੰਜਾਬ ਨੂੰ ਬੰਜਰ ਹੋਣੋਂ, ਸੁੰਨਾ ਹੋਣੋਂ ਅਤੇ ਇਤਿਹਾਸ ਦੀ ਤਰਾਸਦੀ ਦਾ ਸ਼ਿਕਾਰ ਹੋਣੋਂ ਬਚਾ ਸਕਦੀ ਹੈ। ਪੰਜਾਬ ਦੀ ਧਰਤੀ, ਜਿਸ ਦੀਆਂ ਨਦੀਆਂ ਨੇ ਸਦੀਆਂ ਤੋਂ ਸਾਡੀ ਸਭਿਅਤਾ ਨੂੰ ਸਿੰਜਿਆ, ਅੱਜ ਖਤਰੇ ਵਿੱਚ ਹੈ। ਪੰਜਾਬ ਦੇ ਪਾਣੀਆਂ ’ਤੇ ਕੇਂਦਰ ਅਤੇ ਗਵਾਂਢੀ ਰਾਜਾਂ ਦੀਆਂ ਨਜ਼ਰਾਂ ਹਨ, ਅਤੇ ਸਾਡੀ ਗੈਰਤ ਨੂੰ ਚੁਣੌਤੀ ਦਿੱਤੀ ਜਾ ਰਹੀ ਹੈ। ਅਜਿਹੇ ਵਕਤ ਵਿੱਚ, ਪੰਜਾਬੀ ਜਨਤਾ ਦੀਆਂ ਉਮੀਦਾਂ ਤੁਹਾਡੇ ਨਾਲ ਜੁੜੀਆਂ ਹਨ।2022 ਵਿੱਚ, ਪੰਜਾਬ ਦੇ ਲੋਕਾਂ ਨੇ ਪਿਛਲੀਆਂ ਸਰਕਾਰਾਂ ਦੀ ਲੁੱਟ, ਧੋਖੇਬਾਜ਼ੀ ਅਤੇ ਅਪਮਾਨ ਤੋਂ ਤੰਗ ਆ ਕੇ, ਆਮ ਆਦਮੀ ਪਾਰਟੀ ਨੂੰ 92 ਸੀਟਾਂ ਦਾ ਅਣਕਿਆਸਾ ਬਹੁਮਤ ਦਿੱਤਾ। ਇਹ ਜਿੱਤ ਸਿਰਫ਼ ਰਾਜਨੀਤਕ ਨਹੀਂ ਸੀ, ਸਗੋਂ ਲੋਕਾਂ ਦੀ ਚਿਰੋਕਣੀ ਨਿਰਾਸ਼ਤਾ, ਪੰਜਾਬ ਦੇ ਦੁੱਖਾਂ ਅਤੇ ਤੁਹਾਡੀ ਹਰਮਨ ਪਿਆਰਤਾ ਦਾ ਪ੍ਰਤੀਕ ਸੀ। ਲੋਕਾਂ ਨੇ ਤੁਹਾਨੂੰ ਇਸ ਲਈ ਚੁਣਿਆ, ਕਿਉਂਕਿ ਪੰਥ ਦੇ ਨਾਮ ’ਤੇ ਸਿਆਸਤ ਕਰਨ ਵਾਲਿਆਂ ਨੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀਆਂ ਬੇਅਦਬੀਆਂ ਨੂੰ ਅਣਗੌਲਿਆ, ਸਿੱਖ ਨੌਜਵਾਨਾਂ ਦਾ ਖੂਨ ਵਹਾਇਆ, ਅਤੇ ਗੁਟਕਾ ਸਾਹਿਬ ਦੀ ਕਸਮ ਖਾ ਕੇ ਦਿੱਲੀ ਦੀ ਚੌਂਕੀਦਾਰੀ ਕੀਤੀ। ਪੰਜਾਬ ਦੀ ਜੁਆਨੀ ਨੂੰ ਨਸ਼ਿਆਂ ਦੀ ਅੱਗ ਵਿੱਚ ਝੋਂਕਿਆ ਗਿਆ, 1984 ਅਤੇ 1990 ਦੇ ਦਹਾਕੇ ਨੇ ਸਾਡੀ ਇੱਕ ਪੀੜ੍ਹੀ ਡਕਾਰੀ, ਅਤੇ ਡਰ ਦੇ ਮਾਰੇ ਮਾਪਿਆਂ ਨੇ ਆਪਣੀ ਔਲਾਦ ਨੂੰ ਵਿਦੇਸ਼ ਭੇਜਣ ਲਈ ਜ਼ਮੀਨਾਂ-ਜਾਇਦਾਦਾਂ ਵੇਚਣੀਆਂ ਸ਼ੁਰੂ ਕਰ ਦਿੱਤੀਆਂ। ਨਤੀਜਾ, ਪੰਜਾਬ ਸੁੰਨ-ਮ-ਸੁੰਨਾ ਹੁੰਦਾ ਜਾ ਰਿਹਾ ਹੈ, ਅਤੇ ਬੁੱਢੇ ਮਾਪੇ ਇਕੱਲਾਪਣ ਦੇ ਸਾਥੀ ਬਣ ਗਏ।ਇਸ ਸਾਰੇ ਦੁੱਖ ਦੇ ਵਿਚਕਾਰ, ਤੁਹਾਡੀ ਪਾਰਟੀ ਨੂੰ ਮਿਲਿਆ ਬਹੁਮਤ ਲੋਕਾਂ ਦੀ ਆਖਰੀ ਉਮੀਦ ਸੀ। ਪਰ ਅਫ਼ਸੋਸ, ਦਿੱਲੀ ਦੀ ਸੱਤਾ ਨੇ ਪੰਜਾਬ ਨੂੰ ਕਦੇ ਆਪਣਾ ਨਹੀਂ ਸਮਝਿਆ। ਰਾਜ ਸਭਾ ਮੈਂਬਰਾਂ ਦੀ ਨਾਮਜ਼ਦਗੀ ਹੋਵੇ ਜਾਂ ਮੰਤਰੀ ਮੰਡਲ ਦੀ ਚੋਣ, ਦਿੱਲੀ ਵਾਲਿਆਂ ਨੇ ਤੁਹਾਨੂੰ “ਆਓ-ਆਓ ਮਨਾ ਕੇ” ਸੱਤਾ ਸੌਂਪੀ, ਜਿਸ ਨਾਲ ਪੰਜਾਬੀਆਂ ਦੇ ਮਨ ਵਿੱਚ ਸ਼ੱਕ ਪੈਦਾ ਹੋਇਆ।
ਲੋਕ ਚਾਹੁੰਦੇ ਸਨ ਕਿ ਤੁਹਾਡੀ ਸਰਕਾਰ ਕੇਂਦਰ ਦੀਆਂ ਪੰਜਾਬ-ਵਿਰੋਧੀ ਨੀਤੀਆਂ—ਚੰਡੀਗੜ੍ਹ ’ਤੇ ਦਾਅਵੇ ਦੀ ਸਮਾਪਤੀ, ਭਾਖੜਾ ਡੈਮ ਦੀ ਮਾਲਕੀ, ਐਸ.ਵਾਈ.ਐਲ. ਨਹਿਰ, ਅਤੇ ਹਿਮਾਚਲ ਦੀਆਂ ਪਾਣੀ ਦੀਆਂ ਮੰਗਾਂ—ਖ਼ਿਲਾਫ਼ ਮਤੇ ਪਾਸ ਕਰੇ। ਪਰ ਤੁਸੀਂ ਅਕਸਰ ਚੁੱਪ ਧਾਰੀ, ਜਿਸ ਨੇ ਪੰਜਾਬੀ ਗੈਰਤ ਨੂੰ ਠੇਸ ਪਹੁੰਚਾਈ।ਫਿਰ ਵੀ, ਹਾਲ ਹੀ ਵਿੱਚ ਹਰਿਆਣਾ ਨੂੰ ਵਾਧੂ ਪਾਣੀ ਦੇਣ ਦੀ ਕੇਂਦਰੀ ਧੱਕੇਸ਼ਾਹੀ ਖ਼ਿਲਾਫ਼ ਤੁਹਾਡਾ ਹਿੱਕ ਡਾਹਕੇ ਖੜ੍ਹਨਾ ਪੰਜਾਬੀਆਂ ਲਈ ਇੱਕ ਸੁਨਹਿਰੀ ਸੁਨੇਹਾ ਸੀ। ਇਸ ਨੇ ਲੋਕਾਂ ਦੀਆਂ ਉਮੀਦਾਂ ਨੂੰ ਜਗਾਇਆ ਕਿ ਸ਼ਾਇਦ ਭਗਵੰਤ ਸਿੰਘ ਮਾਨ ਪੰਜਾਬ ਦੀ ਆਵਾਜ਼ ਨੂੰ ਦਿੱਲੀ ਦੇ ਦਰਬਾਰ ਵਿੱਚ ਗੂੰਜਣ ਦੇਵੇਗਾ। ਪਰ ਮਨ ਵਿੱਚ ਤੌਖਲਾ ਹੈ—ਕੀ ਦਿੱਲੀ ਵਾਲੇ ਤੁਹਾਨੂੰ ਪੰਜਾਬ ਦੇ ਹੱਕ ਵਿੱਚ ਅੜੀ-ਚੋਟੀ ਦਾ ਜ਼ੋਰ ਲਾਉਣ ਦੇਣਗੇ? 75 ਸਾਲਾਂ ਤੋਂ ਪੰਜਾਬ ਨੇ ਧੋਖੇ ਹੀ ਸਹੇ ਹਨ। ਅਕਾਲੀਆਂ ਅਤੇ ਕਾਂਗਰਸੀਆਂ ਦਾ ਸਿਆਸੀ ਪਤਨ ਇਸੇ ਕਰਕੇ ਹੋਇਆ—ਉਨ੍ਹਾਂ ਨੇ ਪੰਜਾਬ ਦੇ ਪਾਣੀਆਂ ਅਤੇ ਬਿਜਲੀ ਦੀ ਲੁੱਟ ਕਰਵਾਈ, ਬੇਅਦਬੀ ਦੇ ਦੋਸ਼ੀਆਂ ਨੂੰ ਸਜ਼ਾ ਨਾ ਦਿੱਤੀ, ਅਤੇ ਪੰਜਾਬ ਦੇ ਹਿਤਾਂ ਨੂੰ ਕੇਂਦਰ ਦੀਆਂ ਰਹਿਮੋ-ਕਰਮ ’ਤੇ ਛੱਡ ਦਿੱਤਾ।ਭਗਵੰਤ ਸਿਆਂ, ਤੁਸੀਂ ਇੱਕ ਸਫ਼ਲ ਕਮੇਡੀਅਨ ਤੋਂ ਸਿਆਸਤਦਾਨ ਬਣੇ ਹੋ। ਤੁਹਾਡੇ ਅੰਦਰ ਲੋਕ-ਸੇਵਾ ਦਾ ਜਜ਼ਬਾ ਹੈ, ਜਿਸ ਨੇ ਲੋਕਾਂ ਦੇ ਦਿਲ ਜਿੱਤੇ। ਪਰ ਸੱਤਾ ਕੰਡਿਆਂ ਦੀ ਸੇਜ ਹੈ, ਅਤੇ ਪੰਜਾਬ ਦੀ ਸੱਤਾ ਤਾਂ ਦਿੱਲੀ ਦੀਆਂ ਚਾਲਾਂ ਦਾ ਸ਼ਿਕਾਰ ਰਹੀ ਹੈ। ਸਿਆਣਿਆਂ ਦੀ ਕਹਾਵਤ ਹੈ ਕਿ ਚੰਗੇ ਗੁਣ ਦੁਸ਼ਮਣ ਤੋਂ ਵੀ ਸਿੱਖ ਲੈਣੇ ਚਾਹੀਦੇ। ਤੁਹਾਨੂੰ ਤੇਲੰਗਾਨਾ ਦੇ ਸਾਬਕਾ ਮੁੱਖ ਮੰਤਰੀ ਕੇ. ਚੰਦਰਸ਼ੇਖਰ ਰਾਓ ਤੋਂ ਸਿੱਖਣਾ ਚਾਹੀਦਾ, ਜਿਨ੍ਹਾਂ ਨੇ 2018-2023 ਦੌਰਾਨ ਕੇਂਦਰ ਦੀਆਂ ਮਨਮਾਨੀਆਂ ਖ਼ਿਲਾਫ਼ ਕਿਸਾਨਾਂ ਨੂੰ ਅੰਦੋਲਨ ਲਈ ਪ੍ਰੇਰਿਆ, ਆਪਣੀ ਪਾਰਟੀ ਨੂੰ ਸੰਘਰਸ਼ ਵਿੱਚ ਸ਼ਾਮਲ ਕੀਤਾ, ਅਤੇ ਗ੍ਰਾਮ ਪੰਚਾਇਤਾਂ ਤੋਂ ਲੈ ਕੇ ਜ਼ਿਲ੍ਹਾ ਪ੍ਰੀਸ਼ਦਾਂ ਤੱਕ ਮਤੇ ਪਾਸ ਕਰਵਾਏ। ਉਨ੍ਹਾਂ ਦੀ ਇਹ ਲੋਕ-ਪ੍ਰਸਤੀ ਨੇ ਉਨ੍ਹਾਂ ਨੂੰ ਲੋਕ-ਨਾਇਕ ਬਣਾਇਆ।ਅੱਜ ਪੰਜਾਬ ਦੀ ਹੋਣੀ ਤੁਹਾਡੇ ਹੱਥ ਹੈ। ਤੁਸੀਂ ਦੋ ਰਾਹਾਂ ਦੇ ਵਿਚਕਾਰ ਖੜ੍ਹੇ ਹੋ। ਇੱਕ ਰਾਹ ਦਿੱਲੀ ਦੀ ਚਾਪਲੂਸੀ ਦਾ ਹੈ, ਜੋ ਤੁਹਾਨੂੰ ਪੰਜਾਬ ਦੀ ਜਨਤਾ ਦੀਆਂ ਨਜ਼ਰਾਂ ਵਿੱਚ ਖਲਨਾਇਕ ਬਣਾਵੇਗਾ। ਦੂਜਾ ਰਾਹ ਪੰਜਾਬ ਦੀ ਗੈਰਤ, ਪਾਣੀਆਂ ਅਤੇ ਲੋਕਾਂ ਦੇ ਹੱਕ ਦਾ ਹੈ, ਜੋ ਤੁਹਾਨੂੰ ਇਤਿਹਾਸ ਦੇ ਸੁਨਹਿਰੀ ਪੰਨਿਆਂ ਵਿੱਚ ਜੜ ਦੇਵੇਗਾ। ਪੰਜਾਬ-ਵਿਰੋਧੀ ਤਾਕਤਾਂ ਤੁਹਾਨੂੰ ਬੇਅੰਤ ਸਿੰਘ ਜਾਂ ਬਾਦਲ ਵਰਗਾ ਮੋਹਰਾ ਬਣਾਉਣ ਦੀ ਤਾਕ ਵਿੱਚ ਹਨ। ਪਰ ਜੇ ਤੁਸੀਂ ਪੰਜਾਬ ਦੇ ਹੱਕ ਵਿੱਚ ਡਟ ਗਏ, ਤਾਂ ਨਾ ਸਿਰਫ਼ ਪੰਜਾਬੀ ਜਨਤਾ, ਸਗੋਂ ਇਤਿਹਾਸ ਵੀ ਤੁਹਾਨੂੰ ਸਲਾਮ ਕਰੇਗਾ।
ਪੰਜਾਬੀ ਜਨਤਾ ਦੀਆਂ ਮੰਗਾਂ:
ਐਸ.ਵਾਈ.ਐਲ. ਨਹਿਰ, ਹਿਮਾਚਲ ਦੀਆਂ ਮੰਗਾਂ ਅਤੇ ਹਰਿਆਣਾ ਦੀਆਂ ਮਨਮਾਨੀਆਂ ਖ਼ਿਲਾਫ਼ ਸਖ਼ਤ ਰੁਖ ਅਖ਼ਤਿਆਰ ਕਰੋ।ਪੰਜਾਬ ਦੀ ਦਾਅਵੇਦਾਰੀ ਨੂੰ ਮੁੜ ਸਥਾਪਿਤ ਕਰਨ ਲਈ ਵਿਧਾਨ ਸਭਾ ਵਿੱਚ ਮਤੇ ਪਾਸ ਕਰੋ।
ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬੇਅਦਬੀ ਦੇ ਦੋਸ਼ੀਆਂ ਨੂੰ ਸਜ਼ਾ ਦਿਵਾਓ, ਜਿਸ ਨਾਲ ਪੰਥਕ ਜਜ਼ਬਾਤਾਂ ਦਾ ਸਤਿਕਾਰ ਹੋਵੇ। ਪੰਜਾਬ ਦੀ ਜੁਆਨੀ ਨੂੰ ਨਸ਼ਿਆਂ ਦੀ ਬੁਰਾਈ ਤੋਂ ਬਚਾਉਣ ਲਈ ਠੋਸ ਕਦਮ ਚੁੱਕੋ।ਪੰਜਾਬ-ਪੱਖੀ ਨੁਮਾਇੰਦਿਆਂ ਨੂੰ ਭੇਜੋ, ਨਾ ਕਿ ਕਾਰਪੋਰੇਟ ਜਾਂ ਕੇਂਦਰੀ ਹਿਤਾਂ ਦੇ ਪੈਰੋਕਾਰਾਂ ਨੂੰ।ਭਗਵੰਤ ਸਿਆਂ, “ਸੌ ਹੱਥ ਰੱਸਾ ਸਿਰੇ ’ਤੇ ਗੰਢ” ਵਾਲੀ ਗੱਲ ਹੈ। ਜੇ ਤੁਸੀਂ ਦਿੱਲੀ ਦਾ ਮਾਣ ਰੱਖਿਆ, ਤਾਂ ਪੰਜਾਬ ’ਚੋਂ ਗਏ। ਜੇ ਪੰਜਾਬ ਨਾਲ ਖੜ੍ਹੇ, ਤਾਂ ਦਿੱਲੀ ਨੂੰ ਮਨਜ਼ੂਰ ਨਹੀਂ ਹੋਣਾ। ਪਰ ਇਹ ਤੁਹਾਡੇ ’ਤੇ ਨਿਰਭਰ ਹੈ ਕਿ ਤੁਸੀਂ ਮਾਂ ਦੇ ਦੁੱਧ ਦੀ ਲਾਜ ਰੱਖੋਗੇ ਜਾਂ ਕਲੰਕ ਖੱਟੋਗੇ। ਪੰਜਾਬ ਦੇ ਪਾਣੀਆਂ, ਗੈਰਤ ਅਤੇ ਲੋਕਾਂ ਦੇ ਹੱਕ ਲਈ ਲੜੋ। ਸਾਬਤ ਕਰੋ ਕਿ ਤੁਸੀਂ ਸਿਰਫ਼ ਮੁੱਖ ਮੰਤਰੀ ਨਹੀਂ, ਸਗੋਂ ਪੰਜਾਬ ਦਾ ਸੱਚਾ ਸਪੂਤ ਹੋ। ਜੇ ਹੱਕ ਲਈ ਡਟ ਗਏ, ਤਾਂ ਇਤਿਹਾਸ ਤੁਹਾਨੂੰ ਸੁਨਹਿਰੀ ਅੱਖਰਾਂ ਵਿੱਚ ਲਿਖੇਗਾ। ਨਹੀਂ ਤਾਂ, ਪੰਜਾਬੀ ਜਨਤਾ ਅਤੇ ਇਤਿਹਾਸ ਤੁਹਾਨੂੰ ਮੁਆਫ਼ ਨਹੀਂ ਕਰਨਗੇ।
