ਸ਼੍ਰੋਮਣੀ ਅਕਾਲੀ ਦਲ ਦੀ ਸੰਸਦ ਮੈਂਬਰ ਹਰਸਿਮਰਤ ਕੌਰ ਬਾਦਲ ਨੇ ਲੋਕ ਸਭਾ ਵਿੱਚ ਵਕਫ਼ (ਸੋਧ) ਬਿੱਲ 'ਤੇ ਭਾਜਪਾ ਵਿਰੁੱਧ ਇੱਕ ਤਿੱਖਾ ਭਾਸ਼ਣ ਦਿੱਤਾ ਜਿਸ ਵਿੱਚ ਉਨ੍ਹਾਂ ਨੇ ਭਗਵਾ ਪਾਰਟੀ ਲਈ "ਅਸਲੀ ਟੁਕੜੇ-ਟੁਕੜੇ ਗੈਂਗ", "ਕਾਲੇ ਦਿਲ ਵਾਲੇ" ਅਤੇ "ਗੰਦੀ ਰਾਜਨੀਤੀ" ਵਰਗੇ ਸ਼ਬਦਾਂ ਦੀ ਵਰਤੋਂ ਕੀਤੀ, ਜਿਸ ਨਾਲ ਭਾਜਪਾ ਨਾਲ ਤਿੱਖੀ ਕੁੜੱਤਣ ਵਧਣ ਦੀ ਸੰਭਾਵਨਾ ਹੈ।
ਜਿਵੇਂ ਕਿ ਸਾਰਿਆਂ ਦੀਆਂ ਨਜ਼ਰਾਂ ਵਕਫ ਬੋਰਡ ਬਿੱਲ 'ਤੇ ਬਹਿਸ ਬਾਰੇ ਟਿਕੀਆਂ ਹੋਈਆਂ ਹਨ, ਹਰਸਿਮਰਤ ਨੇ ਭਾਜਪਾ 'ਤੇ ਪੰਜਾਬ ਤੋਂ ਬਾਹਰ ਸਿੱਖ ਧਾਰਮਿਕ ਸਥਾਨਾਂ 'ਤੇ ਕਬਜ਼ਾ ਕਰਨ ਦਾ ਦੋਸ਼ ਲਗਾਇਆ ਹੈ। ਅਜਿਹੇ ਸਮੇਂ ਜਦੋਂ ਸਿੱਖਾਂ ਵਿੱਚ ਭਗਵਾ ਪਾਰਟੀ ਪ੍ਰਤੀ ਡੂੰਘੀਆਂ ਚਿੰਤਾਵਾਂ ਹਨ ਤਾਂ ਹਰਸਿਮਰਤ ਕੌਰ ਬਾਦਲ ਗੁਰੂ ਪੰਥ ਦੀਆਂ ਭਾਵਨਾਵਾਂ ਨੂੰ ਸੰਬੋਧਿਤ ਕਰਦੀ ਦਿਖਾਈ ਦਿੱਤੀ ਅਤੇ ਸ਼੍ਰੋਮਣੀ ਅਕਾਲੀ ਦਲ ਦੇ ਮੁੱਖ ਵੋਟਰਾਂ - ਸਿੱਖਾਂ ਨੂੰ ਵਾਪਸ ਜਿੱਤਣ ਦੀ ਪੂਰੀ ਕੋਸ਼ਿਸ਼ ਕਰ ਰਹੀ ਸੀ। ਉਨ੍ਹਾਂ ਕਿਹਾ ਕਿ ਭਾਜਪਾ ਕੋਲ ਲਗਾਤਾਰ ਤੀਜੀ ਵਾਰ ਸੰਸਦ ਵਿੱਚ ਕੋਈ ਮੁਸਲਿਮ ਪ੍ਰਤੀਨਿਧਤਾ ਨਹੀਂ ਹੈ।ਉਨ੍ਹਾਂ ਕੋਲ ਇੱਕ ਵੀ ਔਰਤ ਸੰਸਦ ਨਹੀਂ ਹੈ, ਤਾਂ ਉਨ੍ਹਾਂ ਨੂੰ ਮੁਸਲਮਾਨਾਂ ਲਈ ਇੰਨੀ ਚਿੰਤਾ ਅਤੇ ਪਿਆਰ ਕਿੱਥੋਂ ਆਇਆ?"
ਹਰਸਿਮਰਤ ਕੌਰ ਬਾਦਲ ਨੇ ਕਿਹਾ ਕਿ ਭਾਜਪਾ ਇੱਕ ਅਜਿਹੀ ਫਿਰਕੂ ਪਾਰਟੀ ਹੈ, ਜਿਸਦੀ ਪੂਰੀ ਰਾਜਨੀਤੀ ਹਿੰਦੂਆਂ ਅਤੇ ਮੁਸਲਮਾਨਾਂ ਵਿਚਕਾਰ ਧਰੁਵੀਕਰਨ 'ਤੇ ਅਧਾਰਿਤ ਹੈ,ਜਿਸਦੀ ਪੂਰੀ ਰਾਜਨੀਤੀ ਪਾਕਿਸਤਾਨ, ਮੁਸਲਮਾਨਾਂ ਅਤੇ ਖਾਲਿਸਤਾਨ ਦੇ ਆਲੇ-ਦੁਆਲੇ ਹੈ।ਇਸ ਸੰਦਰਭ ਦੌਰਾਨ ਭਾਜਪਾ ਨੂੰ ਮੁਸਲਮਾਨਾਂ, ਉਨ੍ਹਾਂ ਦੀਆਂ ਔਰਤਾਂ, ਉਨ੍ਹਾਂ ਦੀਆਂ ਜਾਇਦਾਦਾਂ ਲਈ ਇੰਨੀ ਚਿੰਤਾ ਕਿੱਥੋਂ ਆਈ? ਉਹ ਧਰਮ,ਰਾਮ ਭਗਤੀ ਦੀ ਭਾਸ਼ਾ ਬੋਲਦੇ ਹਨ, ਪਰ ਉਨ੍ਹਾਂ ਦੇ ਦਿਲ ਕਾਲੇ ਹਨ, ਅਤੇ ਪੂਰਾ ਦੇਸ਼ ਇਸ ਬਾਰੇ ਜਾਣਦਾ ਹੈ। ਉਨ੍ਹਾਂ ਕਿਹਾ ਕਿ ਸੰਸਦ ਦੇ ਸਾਰੇ 24 ਮੁਸਲਿਮ ਸੰਸਦ ਮੈਂਬਰ ਇਸ ਬਿੱਲ ਦਾ ਸਮਰਥਨ ਨਹੀਂ ਕਰ ਰਹੇ । ਭਾਜਪਾ ਦੇ ਆਪਣੇ ਸੰਸਦ ਮੈਂਬਰਾਂ ਨੂੰ ਛੱਡ ਕੇ, ਸਾਂਝੀ ਸੰਸਦੀ ਕਮੇਟੀ ਦੇ ਸਾਰੇ ਵਿਰੋਧੀ ਮੈਂਬਰਾਂ ਨੇ ਬਿੱਲ ਦਾ ਵਿਰੋਧ ਕੀਤਾ, ਕੋਈ ਵੀ ਘੱਟ ਗਿਣਤੀ ਬਿੱਲ ਦਾ ਸਮਰਥਨ ਨਹੀਂ ਕਰ ਰਿਹਾ ਹੈ। ਜੇਕਰ ਇਹ ਇੰਨਾ ਵਧੀਆ ਹੁੰਦਾ, ਤਾਂ ਉਹ ਇਸਦੀ ਪ੍ਰਸ਼ੰਸਾ ਕਰਦੇ।" ਉਨ੍ਹਾਂ ਕਿਹਾ ਕਿ ਤੱਥ ਇਹ ਹੈ ਕਿ ਦੇਸ਼ ਦੀਆਂ ਸਾਰੀਆਂ ਵਕਫ਼ ਜਾਇਦਾਦਾਂ ਵਿੱਚੋਂ 27% ਉੱਤਰ ਪ੍ਰਦੇਸ਼ ਵਿੱਚ ਹਨ। ਉਨ੍ਹਾਂ ਕਿਹਾ ਕਿ ਕਿਉਂਕਿ ਸੂਬੇ ਵਿੱਚ ਡੇਢ ਸਾਲ ਵਿੱਚ ਚੋਣਾਂ ਹੋਣੀਆਂ ਹਨ, ਇਸ ਲਈ ਇਹ ਰਾਜਨੀਤੀ ਉਨ੍ਹਾਂ ਚੋਣਾਂ ਦੇ ਆਲੇ-ਦੁਆਲੇ ਘੁੰਮਦੀ ਹੈ।
ਫਿਰ ਹਰਸਿਮਰਤ ਕੌਰ ਬਾਦਲ ਪੰਥਕ ਮੁੱਦਿਆਂ ਵੱਲ ਮੁੜ ਗਈ। ਉਸਨੇ ਕਿਹਾ ਕਿ ਜੇ ਤੁਸੀਂ ਘੱਟ ਗਿਣਤੀਆਂ ਬਾਰੇ ਇੰਨੇ ਚਿੰਤਤ ਹੋ ਅਤੇ ਇੱਕ ਬਿੱਲ ਲਿਆਉਣਾ ਚਾਹੁੰਦੇ ਹੋ, ਤਾਂ ਮੈਂ ਪੁੱਛਣਾ ਚਾਹੁੰਦੀ ਹਾਂ ਕਿ ਅਸੀਂ ਸਿੱਖ ਕਈ ਸਾਲਾਂ ਤੋਂ ਧਾਰਾ 25 ਬੀ ਵਿੱਚ ਸੋਧ ਦੀ ਮੰਗ ਕਰ ਰਹੇ ਹਾਂ। ਅਸੀਂ ਸਿੱਖ ਹਾਂ, ਅਸੀਂ ਹਿੰਦੂ ਨਹੀਂ ਹਾਂ... ਉਹ ਬਿੱਲ ਲਿਆਓ ਅਤੇ ਅਸੀਂ ਸਾਰੇ ਇਸਦਾ ਸਮਰਥਨ ਕਰਾਂਗੇ।" ਫਿਰ ਉਸਨੇ ਸਿੱਕਮ ਵਿੱਚ ਡੋਂਗਮਾਰ ਸਾਹਿਬ, ਹਰਿਦੁਆਰ ਵਿੱਚ ਗੁਰਦੁਆਰਾ ਗਿਆਨ ਗੋਦੜੀ ਅਤੇ ਉੜੀਸਾ ਵਿੱਚ ਮੰਗੂ ਮੱਠ ਨੂੰ ਢਾਹੁਣ ਦਾ ਜ਼ਿਕਰ ਕੀਤਾ। ਉਨ੍ਹਾਂ ਕਿਹਾ ਕਿ ਇਹ ਬਹੁਤ ਚੰਗੀ ਗੱਲ ਹੈ ਕਿ ਤੁਸੀਂ ਅਯੁੱਧਿਆ ਮੰਦਰ ਬਣਾਇਆ, ਪਰ ਜੇਕਰ ਤੁਹਾਡੇ ਇਰਾਦੇ ਸਾਫ਼ ਹਨ, ਤਾਂ ਇਸ ਵਿੱਚ ਮੁਸਲਮਾਨਾਂ ਨੂੰ ਵੀ ਸ਼ਾਮਲ ਕਰੋ।" ਉਨ੍ਹਾਂ ਅੱਗੇ ਕਿਹਾ ਕਿ ਤੁਹਾਡਾ ਇਰਾਦਾ ਮੁਸਲਮਾਨਾਂ ਦੀ ਜਾਇਦਾਦ ਅਤੇ ਉਨ੍ਹਾਂ ਦੇ ਪੈਸੇ 'ਤੇ ਕਬਜ਼ਾ ਕਰਨਾ ਹੈ। ਜਿਸ ਤਰ੍ਹਾਂ ਤੁਸੀਂ ਨਾਂਦੇੜ ਅਤੇ ਪਟਨਾ ਸਾਹਿਬ ਵਿੱਚ ਸਿੱਖ ਧਾਰਮਿਕ ਸਥਾਨਾਂ 'ਤੇ ਕਬਜ਼ਾ ਕੀਤਾ ਅਤੇ ਹੁਣ ਤੁਸੀਂ ਸ੍ਰੋਮਣੀ ਕਮੇਟੀ ਵਿੱਚ ਵੀ ਉਹੀ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹੋ।" ਹਰਸਿਮਰਤ ਨੇ ਕਿਹਾ ਕਿ ਤੁਹਾਡੀ ਬੁਲਡੋਜ਼ਰ ਦੀ ਕਾਲੀ ਰਾਜਨੀਤੀ; ਪਾੜੋ ਅਤੇ ਰਾਜ ਕਰੋ ਦੀ ਤੁਹਾਡੀ ਰਾਜਨੀਤੀ ਹੈ। ਤੁਸੀਂ ਟੁਕੜੇ-ਟੁਕੜੇ ਗੈਂਗ ਹੋ; ਤੁਸੀਂ ਲੋਕਾਂ ਨੂੰ ਵੰਡ ਰਹੇ ਹੋ। ਇੱਕ ਥਾਂ ਤੁਸੀਂ ਮੁਸਲਮਾਨਾਂ ਵਿੱਚ ਵੰਡ ਪਾਉਂਦੇ ਹੋ, ਦੂਜੀ ਥਾਂ ਤੁਸੀਂ ਸਿੱਖਾਂ ਵਿੱਚ ਵੰਡ ਪਾਉਂਦੇ ਹੋ। ਹਰਸਿਮਰਤ ਨੇ ਕਿਹਾ ਕਿ ਤੁਹਾਨੂੰ ਆਪਣੀ ਗੰਦੀ ਰਾਜਨੀਤੀ ਦੇ ਪ੍ਰਭਾਵ ਨੂੰ ਸਮਝਣਾ ਚਾਹੀਦਾ ਹੈ; ਤੁਸੀਂ ਜੋ ਬੀਜਦੇ ਹੋ ਉਹੀ ਵੱਢਦੇ ਹੋ। ਜਿਸ ਤਰ੍ਹਾਂ ਤੁਸੀਂ ਦੇਸ਼ ਵਿੱਚ ਘੱਟ ਗਿਣਤੀਆਂ - ਮੁਸਲਮਾਨਾਂ, ਸਿੱਖਾਂ, ਈਸਾਈਆਂ ਨਾਲ ਵਿਵਹਾਰ ਕਰ ਰਹੇ ਹੋ, ਤੁਸੀਂ ਈਸਾਈ ਅਤੇ ਮੁਸਲਿਮ ਬਹੁਗਿਣਤੀ ਵਾਲੇ ਦੇਸ਼ਾਂ ਵਿੱਚ ਰਹਿਣ ਵਾਲੇ ਸਾਡੇ ਹਿੰਦੂ ਲੋਕਾਂ ਲਈ ਮੁਸੀਬਤ ਪੈਦਾ ਕਰ ਰਹੇ ਹੋ।
ਸਿਖ ਚਿੰਤਕ ਵੀ ਮੰਨਦੇ ਹਨ ਕਿ ਜੇਕਰ ਇਹ ਫਿਰਕੂ ਸਰਕਾਰੀ ਭਾਜਪਾਈ ਵਰਤਾਰਾ ਨਾ ਰੋਕਿਆ ਗਿਆ ਤਾਂ ਸਿੱਖਾਂ ਦੇ ਮਨਾਂ ਅੰਦਰ ਪੈਦਾ ਹੋਣ ਵਾਲੀ ਅਸਥਿਰਤਾ ਦੇਸ਼ ਲਈ ਘਾਤਕ ਹੋਵੇਗੀ। ਜਿਹੜੇ ਰਸਤੇ ’ਤੇ ਆਰਐਸਐਸ ਤੇ ਇਸ ਦੀ ਰਾਜਸੀ ਧਿਰ ਭਾਜਪਾ ਚਲ ਰਹੀਆਂ ਹਨ, ਇਸ ਤੋਂ ਪਹਿਲਾਂ ਸਿੱਖ ਵਿਰੋਧੀ ਜਮਾਤ ਕਾਂਗਰਸ ਅਜਿਹਾ ਕਰਿਆ ਕਰਦੀ ਸੀ। ਇਹ ਨੀਤੀ ਸਿੱਖਾਂ ਨੂੰ ਪ੍ਰਵਾਨ ਕਰਨਯੋਗ ਨਹੀਂ ਹੈ ਲਿਹਾਜਾ ਇਸ ਨੂੰ ਰੋਕਿਆ ਜਾਣਾ ਚਾਹੀਦਾ ਹੈ। ਮਈ 2019 ਦੇ 'ਕਾਰਵਾਂ' ਮੈਗਜ਼ੀਨ ਵਿਚ ਨਿਕਿਤਾ ਸਕਸੈਨਾ ਦੀ ਖੋਜ ਰਿਪੋਰਟ ਦੱਸਦੀ ਹੈ ਕਿ ਸਰਕਾਰੀ ਦਸਤਾਵੇਜਾਂ ਵਿਚ ਮੋਦੀ ਸਰਕਾਰ ਅੱਜ ਵੀ 'ਸਿੱਖ ਅਤਿਵਾਦ' ਸ਼ਬਦ ਵਰਤਦੀ ਹੈ। ਰਿਪੋਰਟ ਅਨੁਸਾਰ- 'ਅਤਿਵਾਦ ਨੂੰ ਮਿਲਣ ਵਾਲੀ ਆਰਥਿਕ ਸਹਾਇਤਾ ਉੱਤੇ ਸਥਾਈ ਫੋਕਸ ਸਮੂਹ (ਜੋ ਗ੍ਰਹਿ ਮੰਤਰਾਲੇ ਅਧੀਨ ਆਉਂਦੇ ਖੁਫੀਆ ਵਿਭਾਗ ਅਧੀਨ ਕੰਮ ਕਰਦਾ ਹੈ, ਦੇ ਪੱਤਰ ਵਿਚ ਸਿੱਖ ਅਤਿਵਾਦ ਸ਼ਬਦ ਲਿਖਿਆ ਗਿਆ ਹੈ) ਦਾ ਉਦੇਸ਼ ਇਸਲਾਮੀ ਅਤੇ ਸਿੱਖ ਅਤਿਵਾਦ 'ਤੇ ਕੰਮ ਕਰਨਾ ਹੈ।' ਅਕਾਲੀ ਦਲ ਬਾਦਲ ਹੁਣ ਭਾਜਪਾ ਪੱਖੀ ਪੈਂਤੜੇ ਤੋਂ ਹਟਕੇ ਪੰਥਕ ਪੈਂਤੜਾ ਆਪਨਾ ਲਿਆ ਹੈ ਕਿ ਆਰਐਸਐਸ ਅਤੇ ਭਾਜਪਾ ਵੱਲੋਂ ਸਿੱਖ ਮਸਲਿਆਂ ਵਿਚ ਦਖਲਅੰਦਾਜ਼ੀ ਬੰਦ ਕਰਨੀ ਚਾਹੀਦੀ ਹੈ ਅਤੇ ਇਸ ’ਤੇ ਗਹਿਰਾ ਮੰਥਨ ਕਰਕੇ ਭਵਿੱਖ ਵਿਚ ਸਿੱਖਾਂ ਦੇ ਕੌਮੀ ਮਸਲਿਆਂ ਨੂੰ ਉਲਝਾਉਣ ਵਾਲੀਆਂ ਗਤੀਵਿਧੀਆਂ ਤੋਂ ਗੁਰੇਜ਼ ਕੀਤਾ ਜਾਣਾ ਚਾਹੀਦਾ ਹੈ।ਭਾਵੇਂ ਬਾਦਲ ਦਲ ਦਾ ਪੈਂਤੜਾ ਆਪਣੀ ਰਾਜਨੀਤੀ ਚਮਕਾਉਣਾ ਹੋਵੇ,ਪਰ ਭਾਜਪਾ ਵਿਰੋਧੀ ਬਾਦਲ ਦਲ ਦਾ ਸਟੈਂਡ ਪੰਥਕ ਪਖੀ ਹੈ।
