ਦੂਰਸੰਚਾਰ ਮੰਤਰਾਲੇ ਵੱਲੋਂ ਸਾਰੇ ਨਵੇਂ ਮੋਬਾਇਲ ਫੋਨਾਂ ਵਿੱਚ ਸਰਕਾਰ ਦੀ ਮਾਲਕੀ ਵਾਲੀ ਸਾਈਬਰ ਸੁਰੱਖਿਆ ਐਪ ‘ਸੰਚਾਰ ਸਾਥੀ’ ਪਹਿਲਾਂ ਤੋਂ ਇੰਸਟਾਲ ਕਰਨ ’ਤੇ ਉਸ ਨੂੰ ਫੋਨ ਤੋਂ ਨਾ ਹਟਾਉਣ ਦੇ ਨਿਰਦੇਸ਼ਾਂ ਦੇ ਬਾਅਦ ਹੋਏ ਭਾਰੀ ਵਿਰੋਧ ਦਰਮਿਆਨ ਕੇਂਦਰੀ ਸੰਚਾਰ ਮੰਤਰੀ ਜਿਓਤਿਰਾਦਿਤਿਆ ਸਿੰਧੀਆ ਨੇ ਬੀਤੇ ਦਿਨ ਸਫਾਈ ਦਿੱਤੀ ਕਿ ਇਹ ਐਪ ਵਿਕਲਪਕ ਹੋਵੇਗੀ। ਸੰਸਦ ਦੇ ਬਾਹਰ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਸਿੰਧੀਆ ਨੇ ਕਿਹਾ ਕਿ ਇਹ ਐਪ ਜਾਸੂਸੀ ਜਾਂ ਕਾਲ ਮਾਨੀਟਰਿੰਗ ਨਹੀਂ ਕਰਦੀ। ਇਹ ਆਨਲਾਈਨ ਠੱਗੀ ਤੋਂ ਬਚਾਉਣ ਲਈ ਹੈ। ਤੁਸੀਂ ਆਪਣੀ ਇੱਛਾ ਨਾਲ ਇਸ ਨੂੰ ਸਰਗਰਮ ਜਾਂ ਬੰਦ ਕਰ ਸਕਦੇ ਹੋ। ਜੇ ਤੁਸੀਂ ਸੰਚਾਰ ਸਾਥੀ ਨਹੀਂ ਚਾਹੁੰਦੇ ਤਾਂ ਇਸ ਨੂੰ ਡਿਲੀਟ ਕਰ ਸਕਦੇ ਹੋ। ਇਹ ਉਪਭੋਗਤਾ ਸੁਰੱਖਿਆ ਨਾਲ ਜੁੜੀ ਹੈ। ‘‘ਮੈਂ ਸਾਰੇ ਭਰਮ ਦੂਰ ਕਰਨਾ ਚਾਹੁੰਦਾ ਹਾਂ… ਸਾਡਾ ਫਰਜ਼ ਹੈ ਕਿ ਅਸੀਂ ਇਹ ਐਪ ਸਭ ਤਕ ਪਹੁੰਚਾਈਏ। ’’
ਮੰਤਰੀ ਨੇ ਤਾਂ ਆਪਣੀ ਸਫਾਈ ਦੇ ਦਿੱਤੀ, ਪਰ ਦੂਰਸੰਚਾਰ ਮੰਤਰਾਲੇ ਦੇ 28 ਨਵੰਬਰ ਦੇ ਨਿਰਦੇਸ਼ਾਂ ਦੇ ਹਵਾਲੇ ਨਾਲ ਜਿਹੜਾ ਬਿਆਨ ਪ੍ਰੈੱਸ ਇਨਫਰਮੇਸ਼ਨ ਬਿਊਰੋ (ਪੀ. ਆਈ. ਬੀ.) ਨੇ ਪਿਛਲੇ ਦਿਨੀਂ ਜਾਰੀ ਕੀਤਾ ਸੀ, ਉਸ ਵਿੱਚ ਸਾਫ ਕਿਹਾ ਗਿਆ ਹੈ ਕਿ ਭਾਰਤ ਵਿੱਚ ਇਸਤੇਮਾਲ ਹੋਣ ਵਾਲੇ ਮੋਬਾਇਲ ਹੈਂਡਸੈੱਟ ਦੇ ਨਿਰਮਾਤਾ ਤੇ ਦਰਾਮਦਕਾਰ ਕੰਪਨੀਆਂ ਲਈ ਐਪ ਨੂੰ ਪ੍ਰੀ-ਇੰਸਟਾਲ ਕਰਨਾ ਤੇ ਉਸ ਨੂੰ ਵਰਤੋਂਹੀਣ ਨਾ ਹੋਣ ਦੇਣਾ ਲਾਜ਼ਮੀ ਹੈ। ਇਹ ਯਕੀਨੀ ਬਣਾਇਆ ਜਾਵੇ ਕਿ ਪਹਿਲਾਂ ਤੋਂ ਇੰਸਟਾਲ ਕੀਤੀ ਗਈ ਸੰਚਾਰ ਸਾਥੀ ਐਪ ਡਿਵਾਈਸ ਸੈੱਟਅਪ ਵੇਲੇ ਉਪਭੋਗਤਾ ਨੂੰ ਸਾਫ ਦਿਖਾਈ ਦੇਵੇ ਅਤੇ ਆਸਾਨੀ ਨਾਲ ਖੋਲ੍ਹੀ ਜਾ ਸਕੇ ਤੇ ਇਸ ਦੀ ਕਿਸੇ ਸੁਵਿਧਾ ਨੂੰ ਬੰਦ ਜਾਂ ਸੀਮਤ ਨਾ ਕੀਤਾ ਜਾਵੇ।
ਯਾਨੀ ਕਿ ਮੰਤਰੀ ਸਿੰਧੀਆ ਦੇ ਐਪ ਨੂੰ ਵਿਕਲਪਕ ਦੱਸਣ ਦੀ ਸਚਾਈ ’ਤੇ ਸੰਦੇਹ ਹੈ, ਕਿਉਕਿ ਸਰਕਾਰੀ ਨਿਰਦੇਸ਼ ਮੁਤਾਬਕ ਉਪਭੋਗਤਾ ਸੰਚਾਰ ਸਾਥੀ ਐਪ ਨੂੰ ਡਿਲੀਟ ਨਹੀਂ ਕਰ ਸਕਦਾ। ਜਦੋਂ ਤੱਕ ਸਰਕਾਰੀ ਆਦੇਸ਼ ਵਾਪਸ ਨਹੀਂ ਹੁੰਦਾ, ਮੰਤਰੀ ’ਤੇ ਯਕੀਨ ਨਹੀਂ ਕੀਤਾ ਜਾ ਸਕਦਾ। ਜੇ ਦੂਰਸੰਚਾਰ ਵਿਭਾਗ ਆਦੇਸ਼ ਰੱਦ ਨਹੀਂ ਕਰਦਾ, ਮੰਤਰੀ ਦੇ ਬਿਆਨ ਨੂੰ ਝੂਠ ਹੀ ਸਮਝਿਆ ਜਾਵੇਗਾ।
‘ਸੰਚਾਰ ਸਾਥੀ ਐਪ’ ਪੈਗਾਸਸ ਦਾ ਨਵਾਂ ਰੂਪ ਹੈ-ਸਿਸੋਦੀਆ
ਆਮ ਆਦਮੀ ਪਾਰਟੀ ਦੇ ਸੀਨੀਅਰ ਆਗੂ ਅਤੇ ਦਿੱਲੀ ਦੇ ਸਾਬਕਾ ਉਪ ਮੁੱਖ ਮੰਤਰੀ ਮਨੀਸ਼ ਸਿਸੋਦੀਆ ਨੇ ‘ਸੰਚਾਰ ਸਾਥੀ’ ਐਪ ਵਿਅਕਤੀਗਤ ਆਜ਼ਾਦੀ ਅਤੇ ਨਿੱਜਤਾ ’ਤੇ ਸਿੱਧਾ ਹਮਲਾ ਹੈ। ਉਨ੍ਹਾਂ ਦੋਸ਼ ਲਗਾਇਆ ਕਿ ਭਾਜਪਾ ਸਰਕਾਰ ਨਾ ਸਿਰਫ਼ ਰਾਜਨੀਤਿਕ ਜਾਸੂਸੀ ਲਈ, ਸਗੋਂ ਵੱਡੇ ਬੈਂਕ ਧੋਖਾਧੜੀ ਅਤੇ ਵਿੱਤੀ ਘੁਟਾਲਿਆਂ ਨੂੰ ਵੀ ਸੁਲਝਾਉਣ ਲਈ ਨਾਗਰਿਕਾਂ ਦੇ ਫੋਨਾਂ ’ਚ ਘੁਸਪੈਠ ਕਰਨਾ ਚਾਹੁੰਦੀ ਹੈ। ਉਨ੍ਹਾਂ ਕਿਹਾ ਕਿ ਇਹ ਐਪ ਪੈਗਾਸਸ ਦਾ ਨਵਾਂ ਰੂਪ ਹੈ । ਉਨ੍ਹਾਂ ਅੱਗੇ ਕਿਹਾ ਕਿ ਇੱਕ ਸਰਕਾਰ ਜੋ ਆਪਣੇ ਹੀ ਲੋਕਾਂ ਦੇ ਫੋਨਾਂ ’ਚ ਘੁਸਪੈਠ ਕਰਦੀ ਹੈ, ਉਨ੍ਹਾਂ ਦੀ ਜਾਣਕਾਰੀ ਚੋਰੀ ਕਰਦੀ ਹੈ ਅਤੇ ਉਨ੍ਹਾਂ ਦੀ ਨਿੱਜਤਾ ਨਾਲ ਖੇਡਦੀ ਹੈ, ਜਨਤਾ ਤੋਂ ਇੱਕ ਸਖ਼ਤ ਜਵਾਬ ਦੀ ਹੱਕਦਾਰ ਹੈ । ਲੋਕਾਂ ਨੂੰ ਸਰਕਾਰ ਨੂੰ ਇੱਕ ਸਪੱਸ਼ਟ ਸੁਨੇਹਾ ਦੇਣਾ ਚਾਹੀਦਾ ਹੈ।
