ਸੈਕਰਾਮੈਂਟੋ,ਕੈਲੀਫੋਰਨੀਆ (ਹੁਸਨ ਲੜੋਆ ਬੰਗਾ) ਭਾਰਤੀ ਮੂਲ ਦੇ ਕਾਸ਼ ਪਟੇਲ ਅਮਰੀਕਾ ਦੀ ਚੋਟੀ ਦੀ ਲਾਅ ਇਨਫੋਰਸਮੈਂਟ
ਏਜੰਸੀ ਐਫ ਬੀ ਆਈ ਦੇ ਅਗਲੇ ਮੁੱਖੀ ਹੋਣਗੇ। ਸੈਨੇਟ ਵਿਚ ਅੰਤਿਮ ਵੋਟਿੰਗ ਦੌਰਾਨ ਐਫ ਬੀ ਆਈ ਦੇ ਡਾਇਰੈਕਟਰ ਵਜੋਂ ਉਨਾਂ
ਦੇ ਨਾਂ ਦੀ ਪੁਸ਼ਟੀ ਕਰ ਦਿੱਤੀ ਗਈ ਹੈ ਹਾਲਾਂ ਕਿ 2 ਰਿਪਬਲੀਕਨ ਮੈਂਬਰਾਂ ਨੇ ਪਟੇਲ ਵਿਰੁੱਧ ਵੋਟ ਪਾਈ। ਰਿਪਬਲੀਕਨ ਸੈਨੇਟ
ਮੈਂਬਰ ਸੁਸਾਨ ਕੋਲਿਨਸ ਤੇ ਲੀਸਾ ਮੁਰਕੋਵਸਕੀ ਨੇ ਡੈਮੋਕਰੈਟਸ ਦਾ ਸਾਥ ਦਿੱਤਾ ਤੇ ਉਨਾਂ ਨੇ ਪਟੇਲ ਵਿਰੁੱਧ ਵੋਟ ਪਾਈ। ਪਟੇਲ ਦੇ
ਹੱਕ ਵਿਚ 51 ਤੇ ਵਿਰੋਧ ਵਿਚ 49 ਵੋਟਾਂ ਪਈਆਂ। ਪਹਿਲੀ ਵੋਟਿੰਗ ਦੌਰਾਨ ਪਟੇਲ ਦੇ ਹੱਕ ਵਿਚ 48 ਤੇ ਵਿਰੋਧ ਵਿਚ 45 ਵੋਟਾਂ
ਭੁਗਤੀਆਂ ਸਨ। ਵੋਟਿੰਗ ਤੋਂ ਪਹਿਲਾਂ ਪਟੇਲ ਨੇ ਕਿਹਾ ਕਿ ਉਹ ਐਫ ਬੀ ਆਈ ਦਾ ਰਾਜਸੀਕਰਨ ਨਹੀਂ ਹੋਣ ਦੇਣਗੇ ਤੇ ਨਿਰਪੱਖਤਾ
ਨਾਲ ਕੰਮ ਕਰਨਗੇ। ਪਟੇਲ ਨੇ ਡੈਮੋਕਰੈਟਸ ਉਪਰ ਦੋਸ਼ ਲਾਇਆ ਕਿ ਉਹ ਉਸ ਦੇ ਪੁਰਾਣੇ ਬਿਆਨਾਂ ਨੂੰ ਆਧਾਰ ਬਣਾ ਕੇ ਉਸ ਦਾ
ਵਿਰੋਧ ਕਰ ਰਹੇ ਹਨ। ਰਿਪਬਲੀਕਨ ਮੈਂਬਰਾਂ ਨੇ ਐਫ ਬੀ ਆਈ ਦੇ ਮੁੱਖੀ ਵਜੋਂ ਟਰੰਪ ਦੀ ਚੋਣ ਦਾ ਸਮਰਥਨ ਕਰਦਿਆਂ ਕਿਹਾ ਕਿ
ਪਟੇਲ ਏਜੰਸੀ ਦੇ ਕੰਮਕਾਜ ਵਿਚ ਪਾਰਦਰਸ਼ਤਾ ਲਿਆਉਣਗੇ। ਉਨਾਂ ਨੇ ਪਟੇਲ ਵੱਲੋਂ ਅਤੀਤ ਵਿਚ ਦਿੱਤੇ ਵਿਵਾਦਤ ਬਿਆਨਾਂ ਨੂੰ ਰੱਦ
ਕਰਦਿਆਂ ਕਿਹਾ ਕਿ ਇਹ ਬਿਆਨ ਵਧਾ ਚੜਾ ਕੇ ਪੇਸ਼ ਕੀਤੇ ਗਏ ਹਨ।
