ਇਸਤਾਂਬੁਲ/ਏ.ਟੀ.ਨਿਊਜ਼: ਤੁਰਕੀ ਦੇ ਉੱਤਰ-ਪੱਛਮੀ ਬਰਸਾ ਸ਼ਹਿਰ ਦੇ ਬਾਹਰ ਜੰਗਲ ਦੀ ਅੱਗ ਨਾਲ ਸਬੰਧਿਤ ਘਟਨਾਵਾਂ ਵਿੱਚ ਦੋ ਵਲੰਟੀਅਰਾਂ ਦੀ ਮੌਤ ਹੋ ਗਈ, ਜਿਸ ਨਾਲ ਜੂਨ ਦੇ ਅਖੀਰ ਤੋਂ ਅੱਗ ਵਿੱਚ ਮਰਨ ਵਾਲਿਆਂ ਦੀ ਗਿਣਤੀ 17 ਹੋ ਗਈ ਹੈ। ਨਿਊਜ਼ ਏਜੰਸੀ ਆਈ.ਐਸ.ਏ ਅਨੁਸਾਰ ਇਨ੍ਹਾਂ ਦੋਵਾਂ ਵਲੰਟੀਅਰਾਂ ਨੂੰ ਪਾਣੀ ਦੇ ਟੈਂਕਰ ਦੇ ਹੇਠਾਂ ਤੋਂ ਬਚਾਇਆ ਗਿਆ ਸੀ, ਜੋ ਜੰਗਲ ਦੀ ਅੱਗ ਬੁਝਾਉਣ ਜਾਂਦੇ ਸਮੇਂ ਪਲਟ ਗਿਆ ਸੀ। ਦੋਵਾਂ ਵਲੰਟੀਅਰਾਂ ਦੀ ਹਸਪਤਾਲ ਵਿੱਚ ਇਲਾਜ ਦੌਰਾਨ ਮੌਤ ਹੋ ਗਈ।
ਇਸ ਹਫਤੇ ਦੇ ਅੰਤ ਵਿੱਚ ਤੁਰਕੀ ਦੇ ਚੌਥੇ ਸਭ ਤੋਂ ਵੱਡੇ ਸ਼ਹਿਰ ਬਰਸਾ ਦੇ ਆਲੇ-ਦੁਆਲੇ ਇੱਕ ਭਿਆਨਕ ਅੱਗ ਲੱਗ ਗਈ, ਜਿਸ ਕਾਰਨ 3,500 ਤੋਂ ਵੱਧ ਲੋਕਾਂ ਨੂੰ ਆਪਣੇ ਘਰ ਛੱਡਣ ਲਈ ਮਜਬੂਰ ਹੋਣਾ ਪਿਆ। ਤਾਪਮਾਨ ਵਿੱਚ ਅਸਧਾਰਨ ਵਾਧੇ, ਖੁਸ਼ਕ ਮੌਸਮ ਅਤੇ ਤੇਜ਼ ਹਵਾਵਾਂ ਕਾਰਨ ਅੱਗ ਦੀ ਤੀਬਰਤਾ ਵਧ ਗਈ ਹੈ। ਤੁਰਕੀ ਸਮੇਤ ਪੂਰਬੀ ਮੈਡੀਟੇਰੀਅਨ ਖੇਤਰ ਇਸ ਸਮੇਂ ਤੇਜ਼ ਗਰਮੀ ਦਾ ਸਾਹਮਣਾ ਕਰ ਰਿਹਾ ਹੈ। ਬਰਸਾ ਦੇ ਆਲੇ-ਦੁਆਲੇ ਅੱਗ ਪਿਛਲੇ ਮਹੀਨੇ ਤੁਰਕੀ ਵਿੱਚ ਅੱਗ ਲੱਗਣ ਦੀਆਂ ਕਈ ਘਟਨਾਵਾਂ ਵਿੱਚੋਂ ਇੱਕ ਹੈ। ਹਾਲਾਂਕਿ ਅੱਗ ਬੁਝਾਉਣ ਵਾਲਿਆਂ ਨੇ ਬਹੁਤ ਸਾਰੇ ਘਰਾਂ ਨੂੰ ਸੜਨ ਤੋਂ ਬਚਾਇਆ ਹੈ, ਪਰ ਜੰਗਲ ਦਾ ਇੱਕ ਵੱਡਾ ਹਿੱਸਾ ਸੁਆਹ ਹੋ ਗਿਆ ਹੈ। ਤੁਰਕੀ ਦੇ ਜੰਗਲਾਤ ਮੰਤਰੀ ਇਬਰਾਹਿਮ ਯੁਮਾਕਾਲੀ ਨੇ ਕਿਹਾ ਕਿ ਤੁਰਕੀ ਵਿੱਚ ਘੱਟੋ-ਘੱਟ 44 ਵੱਖ-ਵੱਖ ਅੱਗਾਂ ਲੱਗੀਆਂ ਹਨ। ਬਰਸਾ ਤੋਂ ਇਲਾਵਾ, ਕਰਾਬੁਕ (ਉੱਤਰ-ਪੱਛਮ) ਅਤੇ ਕਹਰਾਮਨਮਾਰਸ (ਦੱਖਣ) ਵਿੱਚ ਅੱਗਾਂ ਸਭ ਤੋਂ ਗੰਭੀਰ ਹਨ।
