ਯੂਕੇ ਦੇ 'ਗਰੂਮਿੰਗ ਗੈਂਗ' ਮੁੱਦੇ ਨੇ ਬ੍ਰਿਟਿਸ਼ ਰਾਜਨੀਤੀ ਵਿੱਚ ਹਲਚਲ ਮਚਾ ਦਿੱਤੀ ਹੈ। ਭਾਰਤੀ ਨੇਤਾ ਵੀ ਇਸ 'ਤੇ ਪ੍ਰਤੀਕਿਰਿਆ ਦੇ ਰਹੇ ਹਨ। ਭਾਰਤੀ ਸੰਸਦ ਮੈਂਬਰ ਪ੍ਰਿਯੰਕਾ ਚਤੁਰਵੇਦੀ ਨੇ ਇਸ 'ਤੇ ਲਿਖਿਆ ਤਾਂ ਐਲੋਨ ਮਸਕ ਨੇ ਵੀ ਇਸ 'ਤੇ ਪ੍ਰਤੀਕਿਰਿਆ ਦਿੱਤੀ ਸੀ। ਜਦੋਂ ਮਸਕ ਨੇ ਐਕਸ 'ਤੇ ਇੱਕ ਪੋਸਟ ਲਿਖੀ, ਤਾਂ ਇਸ ਬਾਰੇ ਚਰਚਾ ਪੂਰੀ ਦੁਨੀਆ ਵਿੱਚ ਤੇਜ਼ ਹੋ ਗਈ।ਮਸਕ ਨੇ ਸੋਸ਼ਲ ਮੀਡੀਆ 'ਐਕਸ' 'ਤੇ ਇਸ ਬਾਰੇ ਕਈ ਪੋਸਟਾਂ ਪਾ ਕੇ ਬਰਤਾਨਵੀ ਪ੍ਰਧਾਨ ਮੰਤਰੀ ਕੀਅਰ ਸਟਾਰਮਰ ਦੀ ਭੂਮਿਕਾ 'ਤੇ ਸਵਾਲ ਚੁੱਕੇ ਸਨ। ਮਸਕ ਨੇ ਲਿਖਿਆ ਕਿ ਪੀਐੱਮ ਸਟਾਰਮਰ 'ਗਰੂਮਿੰਗ ਗੈਂਗਸ ਸਕੈਂਡਲ' ਨੂੰ ਸਹੀ ਤਰ੍ਹਾਂ ਨਾਲ ਸੰਭਾਲਣ ਵਿਚ ਨਾਕਾਮ ਰਹੇ ਹਨ।
ਸਾਲ 2008 ਤੋਂ ਸਾਲ 2013 ਵਿਚਾਲੇ ਪ੍ਰਧਾਨ ਮੰਤਰੀ ਸਟਾਰਮਰ, ਕਰਾਊਨ ਪ੍ਰੋਸੀਕਿਊਸ਼ਨ ਸਰਵਿਸ ਦੇ ਪ੍ਰਮੁੱਖ ਹੁੰਦੇ ਸਨ।ਹਾਲਾਂਕਿ, ਪ੍ਰਧਾਨ ਮੰਤਰੀ ਸਟਾਰਮਰ ਨੇ ਆਲੋਚਕਾਂ 'ਤੇ ਇਸ ਮਾਮਲੇ ਬਾਰੇ 'ਝੂਠੀ ਅਤੇ ਗਲਤ ਜਾਣਕਾਰੀ' ਫੈਲਾਉਣ ਦਾ ਇਲਜ਼ਾਮ ਲਗਾਇਆ ਅਤੇ ਦਾਅਵਾ ਕੀਤਾ ਕਿ ਉਨ੍ਹਾਂ ਨੇ ਇਸ ਨੂੰ ਸਹੀ ਢੰਗ ਨਾਲ ਹੈਂਡਲ ਕੀਤਾ।
ਰਾਜ ਸਭਾ ਮੈਂਬਰ ਪ੍ਰਿਯੰਕਾ ਚਤੁਰਵੇਦੀ ਨੇ ਕਿਹਾ ਸੀ ਕਿ ਬ੍ਰਿਟੇਨ ਵਿੱਚ ਗੈਂਗਾਂ ਨੂੰ ਤਿਆਰ ਕਰਨ ਦਾ ਦੋਸ਼ "ਏਸ਼ੀਆਈ ਗੈਂਗਾਂ" ਨੂੰ ਨਹੀਂ ਦਿੱਤਾ ਜਾ ਸਕਦਾ ਬਲਕਿ ਇੱਕ "ਠੱਗ ਦੇਸ਼" ਪਾਕਿਸਤਾਨ ਨੂੰ ਦਿੱਤਾ ਜਾ ਸਕਦਾ ਹੈ। ਇਸ 'ਤੇ ਐਲਨ ਮਸਕ ਨੇ ਕਿਹਾ ਕਿ ਇਹ ਸੱਚ ਹੈ।
ਪ੍ਰਿਯੰਕਾ ਚਤੁਰਵੇਦੀ ਅਤੇ ਐਲੋਨ ਮਸਕ ਦਾ ਇਹ ਬਿਆਨ ਅਜਿਹੇ ਸਮੇਂ ਆਇਆ ਸੀ ਜਦੋਂ ਬ੍ਰਿਟੇਨ ਦੀ ਵਿਰੋਧੀ ਕੰਜ਼ਰਵੇਟਿਵ ਪਾਰਟੀ ਨੇ ਦਹਾਕੇ ਤੋਂ ਵੱਧ ਪੁਰਾਣੇ 'ਗਰੂਮਿੰਗ ਗੈਂਗ' ਮਾਮਲੇ ਦੀ ਨਵੀਂ ਰਾਸ਼ਟਰੀ ਜਾਂਚ ਦੇ ਗਠਨ ਲਈ ਦਬਾਅ ਬਣਾਉਣ ਲਈ ਸੰਸਦ ਵਿਚ ਬਹਿਸ ਕੀਤੀ ਸੀ। ਪ੍ਰਿਯੰਕਾ ਚਤੁਰਵੇਦੀ ਨੇ ਬੀਤੇ ਸੋਮਵਾਰ ਨੂੰ ਬ੍ਰਿਟਿਸ਼ ਲੇਬਰ ਪ੍ਰਧਾਨ ਮੰਤਰੀ ਕੀਰ ਸਟਾਰਮਰ ਦੇ ਉਸ ਬਿਆਨ 'ਤੇ ਇਤਰਾਜ਼ ਜਤਾਇਆ ਜਿਸ ਵਿੱਚ ਉਨ੍ਹਾਂ ਨੇ ਕਿਹਾ ਸੀ ਕਿ 2008 ਅਤੇ 2013 ਵਿਚਕਾਰ ਕਰਾਊਨ ਪ੍ਰੌਸੀਕਿਊਸ਼ਨ ਸਰਵਿਸ ਦੇ ਮੁਖੀ ਵਜੋਂ ਆਪਣੇ ਕਾਰਜਕਾਲ ਦੌਰਾਨ, ਉਨ੍ਹਾਂ ਨੇ ਪਹਿਲੇ ਏਸ਼ੀਅਨ ਗਰੂਮਿੰਗ ਗੈਂਗ 'ਤੇ ਮੁਕੱਦਮਾ ਚਲਾਇਆ ਸੀ।
ਗਰੂਮਿੰਗ ਗੈਂਗ ਸਕੈਂਡਲ ਦਾ ਰਹੱਸ ਕੀ ਹੈ?
ਗਰੂਮਿੰਗ ਗੈਂਗ ਸਕੈਂਡਲ ਇੱਕ ਹਾਈ ਪ੍ਰੋਫ਼ਾਈਲ ਕੇਸ ਹੈ। ਇਨ੍ਹਾਂ ਵਿੱਚ ਕੁਝ ਪੁਰਸ਼ਾਂ ਦੇ ਟੋਲਿਆਂ (ਜਿਨ੍ਹਾਂ ਵਿੱਚ ਜ਼ਿਆਦਾਤਰ ਪਾਕਿਸਤਾਨੀ ਮੂਲ ਦੇ ਸਨ) ਨੂੰ ਯੂਨਾਈਟਿਡ ਕਿੰਗਡਮ ਵਿੱਚ ਘੱਟ ਉਮਰ ਦੀਆਂ ਗੋਰੀਆਂ ਕੁੜੀਆਂ ਨਾਲ ਜਿਨਸੀ ਸ਼ੋਸ਼ਣ ਅਤੇ ਬਲਾਤਕਾਰ ਕਰਨ ਦੇ ਮਾਮਲੇ 'ਚ ਦੋਸ਼ੀ ਪਾਇਆ ਗਿਆ ਸੀ।ਸਾਲ 2012 ਵਿੱਚ ਦ ਟਾਈਮਜ਼ ਨਿਊਜ਼ ਪੇਪਰ ਨੇ ਰੋਦਰਹੈਮ ਗਰੂਮਿੰਗ ਗੈਂਗਸ ਬਾਰੇ ਪੜਚੋਲ ਕੀਤੀ ਸੀ, ਜਿਸ ਮਗਰੋਂ ਇਸ ਮਾਮਲੇ ਦੀ ਜਾਂਚ ਸ਼ੁਰੂ ਹੋਈ।
ਇਸ ਰਿਪੋਰਟ ਨੇ ਬ੍ਰਿਟੇਨ ਸਣੇ ਦੁਨੀਆਂ ਭਰ ਵਿੱਚ ਸੁਰਖੀਆਂ ਬਟੋਰੀਆਂ ਅਤੇ ਇਸ ਬਾਰੇ ਬ੍ਰਿਟੇਨ ਦੀ ਸੰਸਦ ਵਿੱਚ ਵੱਡੀ ਬਹਿਸ ਵੀ ਹੋਈ ਸੀ।ਇਸੇ ਤਰ੍ਹਾਂ ਦੇ ਘੁਟਾਲੇ ਓਲਡਹੈਮ, ਆਕਸਫੋਰਡ, ਰੌਚਡੇਲ ਅਤੇ ਟੇਲਫੋਰਡ ਵਰਗੇ ਸ਼ਹਿਰਾਂ ਵਿੱਚ ਵੀ ਸਾਹਮਣੇ ਆਏ ਸਨ। ਇਸ ਤੋਂ ਬਾਅਦ ਬੱਚਿਆਂ ਨਾਲ ਜਿਨਸੀ ਸ਼ੋਸ਼ਣ ਹੋਣ ਦੇ ਮਾਮਲੇ ਦੀ ਰਾਸ਼ਟਰੀ ਪੱਧਰ 'ਤੇ ਜਾਂਚ ਹੋਈ ਸੀ।ਅਜਿਹੇ ਇਲਜ਼ਾਮ ਲੱਗੇ ਕਿ ਅਪਰਾਧ ਦੇ ਇਨ੍ਹਾਂ ਮਾਮਲਿਆਂ ਨਾਲ ਨਾ ਤਾਂ ਸਹੀ ਤਰ੍ਹਾਂ ਨਜਿੱਠਿਆ ਗਿਆ ਅਤੇ ਨਾ ਹੀ ਪੀੜਤਾਂ ਦੀ ਮਦਦ ਕੀਤੀ ਗਈ।
ਨਿਊਯਾਰਕ ਟਾਈਮਜ਼ ਦੀ ਰਿਪੋਰਟ ਮੁਤਾਬਕ ਉਸ ਸਮੇਂ ਦੇ ਇਕ ਜਾਸੂਸ ਚੀਫ ਇੰਸਪੈਕਟਰ ਐਲਨ ਐਡਵਰਡਸ ਨੇ ਅਖਬਾਰ ਨੂੰ ਦੱਸਿਆ, 'ਹਰ ਕੋਈ ਨਸਲੀ ਕਾਰਕ ਤੋਂ ਬਹੁਤ ਡਰਦਾ ਹੈ।' ਇਨ੍ਹਾਂ ਮਾਮਲਿਆਂ ਨੂੰ 'ਗਰੂਮਿੰਗ ਗੈਂਗ' ਸਕੈਂਡਲ ਵਜੋਂ ਜਾਣਿਆ ਜਾਂਦਾ ਹੈ। 2014 ਵਿੱਚ, ਰੋਦਰਹੈਮ ਕਸਬੇ ਵਿੱਚ ਅਜਿਹੇ ਦੁਰਵਿਵਹਾਰ ਦੀ ਇੱਕ ਸਾਲ ਲੰਬੀ ਅਧਿਕਾਰਤ ਜਾਂਚ ਦੇ ਨਤੀਜਿਆਂ ਨੇ ਇੱਕ ਵੱਡੀ ਰਾਸ਼ਟਰੀ ਬਹਿਸ ਛੇੜ ਦਿੱਤੀ ਸੀ।
ਸਮੱਸਿਆ ਕਿੰਨੀ ਵੱਡੀ?
ਯੂਕੇ ਵਿੱਚ ਬੱਚਿਆਂ ਦੇ ਜਿਨਸੀ ਸ਼ੋਸ਼ਣ ਦੇ ਮਾਮਲਿਆਂ ਵਿੱਚ ਗੈਂਗ-ਅਧਾਰਿਤ ਅਪਰਾਧ ਬਹੁਤ ਘੱਟ ਹੁੰਦੇ ਹਨ। ਦ ਇੰਡੀਅਨ ਐਕਸਪ੍ਰੈਸ ਦੀ ਰਿਪੋਰਟ ਅਨੁਸਾਰ ਯੂਕੇ ਪੁਲਿਸ ਦੁਆਰਾ ਜਾਰੀ ਕੀਤੇ ਗਏ ਅੰਕੜਿਆਂ ਵਿੱਚ ਕਿਹਾ ਗਿਆ ਸੀ ਕਿ 2023 ਵਿੱਚ ਯੂਕੇ ਵਿੱਚ ਬੱਚਿਆਂ ਦੇ ਸ਼ੋਸ਼ਣ ਵਿਰੁੱਧ ਦਰਜ ਕੀਤੇ ਗਏ 1.15 ਲੱਖ ਤੋਂ ਵੱਧ ਜਿਨਸੀ ਅਪਰਾਧਾਂ ਵਿੱਚੋਂ 4,228 (3.7 ਪ੍ਰਤੀਸ਼ਤ) ਗੈਂਗ-ਆਧਾਰਿਤ ਅਪਰਾਧ ਸਨ। ਇਹਨਾਂ ਵਿੱਚੋਂ, 26 ਪ੍ਰਤੀਸ਼ਤ ਅਪਰਾਧ ਪਰਿਵਾਰਾਂ ਦੇ ਅੰਦਰ ਹੋਏ, ਜਦੋਂ ਕਿ 17 ਪ੍ਰਤੀਸ਼ਤ ਵਿੱਚ ਗਰੂਮਿੰਗ ਗੈਂਗ ਸਮੇਤ ਸਮੂਹ ਸ਼ਾਮਲ ਸਨ। ਸਕੂਲ, ਧਾਰਮਿਕ ਸਥਾਨ, ਕਮਿਊਨਿਟੀ ਸੈਂਟਰ ਅਤੇ ਹੋਰ ਅਜਿਹੇ ਅਦਾਰੇ ਨੌਂ ਪ੍ਰਤੀਸ਼ਤ ਗੈਂਗ-ਅਧਾਰਿਤ ਅਪਰਾਧਾਂ ਲਈ ਜ਼ਿੰਮੇਵਾਰ ਸਨ।
ਅਪ੍ਰੈਲ 2023 ਵਿੱਚ ਤਤਕਾਲੀ ਪ੍ਰਧਾਨ ਮੰਤਰੀ ਰਿਸ਼ੀ ਸੁਨਕ ਦੁਆਰਾ ਗਰੂਮਿੰਗ ਗੈਂਗਾਂ ਨਾਲ ਨਜਿੱਠਣ ਲਈ ਬਣਾਈ ਗਈ ਇੱਕ ਟਾਸਕ ਫੋਰਸ ਨੇ ਆਪਣੇ ਕਾਰਜਕਾਲ ਦੇ ਪਹਿਲੇ ਸਾਲ ਵਿੱਚ 550 ਤੋਂ ਵੱਧ ਸ਼ੱਕੀਆਂ ਨੂੰ ਗ੍ਰਿਫਤਾਰ ਕੀਤਾ ਸੀ।
ਇੰਗਲੈਂਡ ਦੇ ਕਈ ਸ਼ਹਿਰਾਂ ਵਿੱਚ ਨੌਜਵਾਨ ਕੁੜੀਆਂ ਨੂੰ ਗੁਮਰਾਹ ਕਰਨ ਵਾਲੇ ਅਪਰਾਧੀਆਂ ਦੇ ਇੱਕ ਨੈੱਟਵਰਕ ਦਾ ਪਰਦਾਫਾਸ਼ ਹੋਇਆ ਸੀ, ਜਿਸ ਨਾਲ ਲੋਕਾਂ ਵਿੱਚ ਚਿੰਤਾ ਪੈਦਾ ਹੋ ਗਈ ਹੈ। ਇਹ 'ਗੈਂਗ' ਨਾਬਾਲਗ ਪੀੜਤਾਂ ਨਾਲ ਦੋਸਤੀ ਕਰਕੇ ਸ਼ੋਸ਼ਣ ਕਰਦੇ ਹਨ, ਅਕਸਰ ਉਨ੍ਹਾਂ ਨੂੰ ਲੁਭਾਉਣ ਲਈ ਸ਼ਰਾਬ, ਨਸ਼ੀਲੇ ਪਦਾਰਥਾਂ ਅਤੇ ਤੋਹਫ਼ਿਆਂ ਦੀ ਵਰਤੋਂ ਕਰਦੇ ਹਨ।
ਹਾਲਾਂਕਿ, 2022 ਵਿੱਚ ਜਾਰੀ ਕੀਤੀ ਗਈ ਇੱਕ ਸੁਤੰਤਰ ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਸਥਾਨਕ ਅਧਿਕਾਰੀ ਕੁਝ ਬੱਚਿਆਂ ਨੂੰ ਸ਼ੋਸ਼ਣ ਤੋਂ ਬਚਾਉਣ ਵਿੱਚ ਅਸਫਲ ਰਹੇ ਹਨ। ਓਲਡਹੈਮ ਮਾਮਲਿਆਂ ਦੀ ਜਾਂਚ ਦੇ ਦਾਇਰੇ ਨੂੰ ਵਧਾਉਣ ਲਈ ਜਨਤਕ ਮੰਗ ਵਧ ਰਹੀ ਹੈ। 2024 ਵਿੱਚ ਗ੍ਰੇਟਰ ਮੈਨਚੈਸਟਰ ਦੇ ਮੇਅਰ ਐਂਡੀ ਬਰਨਹੈਮ ਦੁਆਰਾ ਸ਼ੁਰੂ ਕੀਤੀ ਗਈ ਇੱਕ ਸੁਤੰਤਰ ਸਮੀਖਿਆ ਵਿੱਚ ਪਾਇਆ ਗਿਆ ਕਿ ਰੋਚਡੇਲ ਵਿੱਚ ਵੱਡੇ ਪੱਧਰ 'ਤੇ ਨੌਜਵਾਨ ਕੁੜੀਆਂ ਨੂੰ ਆਪਣੇ ਜਾਲ ਵਿਚ ਫਸਾਕੇ ਉਨ੍ਹਾਂ ਦਾ ਸ਼ੋਸ਼ਣ ਕੀਤਾ ਗਿਆ ਸੀ।
ਇਸਨੇ 2004 ਅਤੇ 2013 ਦੇ ਵਿਚਕਾਰ ਇਨ੍ਹਾਂ ਮਾਮਲਿਆਂ ਦੀ ਸਹੀ ਢੰਗ ਨਾਲ ਜਾਂਚ ਕਰਨ ਵਿੱਚ ਅਧਿਕਾਰੀਆਂ ਦੀ ਅਸਫਲਤਾ ਨੂੰ ਵੀ ਉਜਾਗਰ ਕੀਤਾ। ਨੌਂ ਦੋਸ਼ੀਆਂ ਨੂੰ ਦੋਸ਼ੀ ਠਹਿਰਾਇਆ ਗਿਆ, ਜਿਨ੍ਹਾਂ ਵਿੱਚੋਂ ਅੱਠ ਬ੍ਰਿਟਿਸ਼-ਪਾਕਿਸਤਾਨੀ ਆਦਮੀ ਸਨ। ਰਿਪੋਰਟ ਵਿੱਚ ਪਾਇਆ ਗਿਆ ਕਿ ਛੋਟੀਆਂ ਕੁੜੀਆਂ ਨੂੰ ਟੇਕਵੇਅ ਦੁਕਾਨਾਂ ਦੇ ਉੱਪਰ ਨਸ਼ੀਲਾ ਪਦਾਰਥ ਪਿਲਾਇਆ ਜਾਂਦਾ ਸੀ ਅਤੇ ਬਲਾਤਕਾਰ ਕੀਤਾ ਜਾਂਦਾ ਸੀ।
ਰੌਚਡੇਲ ਸਮੀਖਿਆ ਪ੍ਰੋਫੈਸਰ ਅਲੈਕਸਿਸ ਜੇਅ ਦੁਆਰਾ 2014 ਦੀ ਇੱਕ ਰਿਪੋਰਟ 'ਤੇ ਅਧਾਰਿਤ ਹੈ, ਜਿਸ ਵਿੱਚ 1997 ਅਤੇ 2013 ਦੇ ਵਿਚਕਾਰ ਰੋਦਰਹੈਮ ਵਿੱਚ ਗਰੂਮਿੰਗ ਗਿਰੋਹਾਂ ਦੀ ਗਤੀਵਿਧੀ ਦੀ ਜਾਂਚ ਕੀਤੀ ਗਈ ਸੀ। ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਉਸ ਸਮੇਂ ਦੌਰਾਨ 1,400 ਬੱਚਿਆਂ, ਜਿਨ੍ਹਾਂ ਵਿੱਚੋਂ ਕੁਝ 11 ਸਾਲ ਦੇ ਸਨ, ਨਾਲ ਸ਼ੋਸ਼ਣ ਕੀਤਾ ਗਿਆ। ਇਸ ਵਿੱਚ ਦੱਸਿਆ ਗਿਆ ਸੀ ਕਿ ਕਿਵੇਂ ਬੱਚਿਆਂ ਨੂੰ ਬੰਦੂਕਾਂ ਨਾਲ ਧਮਕਾਇਆ ਜਾਂਦਾ ਸੀ। ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਜ਼ਿਆਦਾਤਰ ਪੀੜਤ ਗੋਰੀਆਂ ਕੁੜੀਆਂ ਸਨ ਅਤੇ ਅਪਰਾਧੀ ਪਾਕਿਸਤਾਨੀ ਮੂਲ ਦੇ ਸਨ। ਇਸੇ ਤਰ੍ਹਾਂ ਦੇ ਮਾਮਲੇ ਟੈਲਫੋਰਡ, ਆਕਸਫੋਰਡ, ਬ੍ਰਿਸਟਲ ਅਤੇ ਹੋਰ ਸ਼ਹਿਰਾਂ ਅਤੇ ਕਸਬਿਆਂ ਵਿੱਚ ਪਾਏ ਗਏ ਹਨ।
ਨਸਲਵਾਦ ਦਾ ਸਵਾਲ
ਆਪਣੀ 2014 ਦੀ ਰਿਪੋਰਟ ਵਿੱਚ ਪ੍ਰੋਫੈਸਰ ਜੇਅ ਨੇ ਉਲੇਖ ਕੀਤਾ ਕਿ ਕੌਂਸਲ ਦੇ ਸਟਾਫ ਨੇ 'ਨਸਲਵਾਦੀ ਸਮਝੇ ਜਾਣ ਦੇ ਡਰੋਂ ਅਪਰਾਧੀਆਂ ਦੇ ਨਸਲੀ ਮੂਲ ਦੀ ਪਛਾਣ ਕਰਨ ਬਾਰੇ ਆਪਣੀ ਘਬਰਾਹਟ ਜ਼ਾਹਰ ਕੀਤੀ ਸੀ;' ਦੂਜਿਆਂ ਨੂੰ ਅਜਿਹਾ ਨਾ ਕਰਨ ਲਈ ਆਪਣੇ ਪ੍ਰਬੰਧਕਾਂ ਤੋਂ ਸਪੱਸ਼ਟ ਨਿਰਦੇਸ਼ ਮਿਲੇ ਸਨ।
ਅਪਰਾਧ ਨੂੰ ਅਪਰਾਧੀਆਂ ਦੀ ਜਾਤੀ ਨਾਲ ਜੋੜਨ ਦੇ ਦਾਅਵੇ ਤੱਥਹੀਣ ਹਨ। 50 ਖੋਜਕਰਤਾਵਾਂ ਦੁਆਰਾ ਦਸਤਖਤ ਕੀਤੇ ਇੱਕ ਪੱਤਰ ਵਿੱਚ ਚੇਤਾਵਨੀ ਦਿੱਤੀ ਗਈ ਹੈ ਕਿ ਅਜਿਹੇ ਨਸਲੀ ਦਾਅਵੇ 'ਗਲਤ ਜਾਣਕਾਰੀ, ਨਸਲਵਾਦ ਅਤੇ ਵੰਡ ਨੂੰ ਹਵਾ ਦਿੰਦੇ ਹਨ'।
2020 ਵਿੱਚ ਯੂਕੇ ਦੇ ਗ੍ਰਹਿ ਦਫ਼ਤਰ ਦੁਆਰਾ ਪ੍ਰਕਾਸ਼ਿਤ ਇੱਕ ਰਿਪੋਰਟ ਵਿੱਚ ਕਿਹਾ ਗਿਆ ਸੀ ਕਿ ਇਹ ਸਿੱਟਾ ਕੱਢਣ ਲਈ ਕਾਫ਼ੀ ਅੰਕੜੇ ਨਹੀਂ ਸਨ ਕਿ ਗੈਂਗ-ਅਧਾਰਿਤ ਅਪਰਾਧ ਕਰਨ ਵਾਲੇ ਜ਼ਿਆਦਾਤਰ ਅਪਰਾਧੀ ਏਸ਼ੀਆਈ ਜਾਂ ਪਾਕਿਸਤਾਨੀ ਸਨ। ਇਸ ਵਿੱਚ ਪਾਇਆ ਗਿਆ ਕਿ ਬੱਚਿਆਂ ਵਿਰੁੱਧ ਜਿਨਸੀ ਅਪਰਾਧ ਕਰਨ ਵਾਲੇ ਜ਼ਿਆਦਾਤਰ ਅਪਰਾਧੀ ਗੋਰੇ ਸਨ।
ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ 'ਕੁਝ ਅਧਿਐਨਾਂ ਤੋਂ ਪਤਾ ਚੱਲਦਾ ਹੈ ਕਿ ਰਾਸ਼ਟਰੀ ਆਬਾਦੀ ਦੇ ਜਨਸੰਖਿਆ ਦੇ ਮੁਕਾਬਲੇ ਕਾਲੇ ਅਤੇ ਏਸ਼ੀਆਈ ਅਪਰਾਧੀਆਂ ਦੀ ਪ੍ਰਤੀਨਿਧਤਾ ਜ਼ਿਆਦਾ ਹੈ।' ਹਾਲਾਂਕਿ, ਇਹ ਸਿੱਟਾ ਕੱਢਣਾ ਸੰਭਵ ਨਹੀਂ ਹੈ ਕਿ ਇਹ ਸਾਰੇ ਗੈਂਗ-ਅਧਾਰਿਤ ਬਾਲ ਜਿਨਸੀ ਸ਼ੋਸ਼ਣ ਦੇ ਅਪਰਾਧਾਂ ਨੂੰ ਦਰਸਾਉਂਦੇ ਹਨ।
