ਅਟਲਾਂਟਾ/ਏ.ਟੀ.ਨਿਊਜ਼: ਕੇਬਲ ਟੀਵੀ ਨਿਊਜ਼ ਦੇ ਖੇਤਰ ਵਿੱਚ ਕ੍ਰਾਂਤੀ ਲਿਆਉਣ ਵਾਲੇ ਅਤੇ ਦੁਨੀਆ ਦੇ ਪਹਿਲੇ 24 ਘੰਟੇ ਚੱਲਣ ਵਾਲੇ ਨਿਊਜ਼ ਨੈੱਟਵਰਕ ਸੀ.ਐਨ.ਐਨ. ਦੇ ਸੰਸਥਾਪਕ ਟੈੱਡ ਟਰਨਰ ਦਾ ਪਿਛਲੇ ਦਿਨੀਂ 87 ਸਾਲ ਦੀ ਉਮਰ ਵਿੱਚ ਦੇਹਾਂਤ ਹੋ ਗਿਆ। ਟਰਨਰ ਐਂਟਰਪ੍ਰਾਈਜ਼ਿਜ਼ ਵੱਲੋਂ ਜਾਰੀ ਇੱਕ ਬਿਆਨ ਰਾਹੀਂ ਇਸ ਦੁਖਦਾਈ ਖ਼ਬਰ ਦੀ ਪੁਸ਼ਟੀ ਕੀਤੀ ਗਈ ਹੈ।
ਓਹੀਓ ਵਿੱਚ ਜਨਮੇ ਅਤੇ ਅਟਲਾਂਟਾ ਦੇ ਮਸ਼ਹੂਰ ਕਾਰੋਬਾਰੀ ਟੈੱਡ ਟਰਨਰ ਨੂੰ ਉਨ੍ਹਾਂ ਦੇ ਬੇਬਾਕ ਸੁਭਾਅ ਕਾਰਨ ‘ਮਾਊਥ ਆਫ ਦਿ ਸਾਊਥ’ ਦੇ ਨਾਂਅ ਨਾਲ ਵੀ ਜਾਣਿਆ ਜਾਂਦਾ ਸੀ। ਉਨ੍ਹਾਂ ਨੇ ਇੱਕ ਅਜਿਹਾ ਮੀਡੀਆ ਸਾਮਰਾਜ ਖੜ੍ਹਾ ਕੀਤਾ ਜਿਸ ਵਿੱਚ ਕੇਬਲ ਦਾ ਪਹਿਲਾ ਸੁਪਰਸਟੇਸ਼ਨ, ਕਾਰਟੂਨ ਨੈੱਟਵਰਕ, ਫ਼ਿਲਮੀ ਚੈਨਲ ਅਤੇ ਅਟਲਾਂਟਾ ਬ੍ਰੇਵਜ਼ ਵਰਗੀਆਂ ਪੇਸ਼ੇਵਰ ਟੀਮਾਂ ਸ਼ਾਮਲ ਸਨ। ਸਾਲ 1991 ਵਿੱਚ, ਉਨ੍ਹਾਂ ਨੂੰ ਟਾਈਮ ਮੈਗਜ਼ੀਨ ਵੱਲੋਂ ‘ਮੈਨ ਆਫ ਦਿ ਈਅਰ’ ਚੁਣਿਆ ਗਿਆ ਸੀ।
ਮੀਡੀਆ ਤੋਂ ਇਲਾਵਾ ਟਰਨਰ ਇੱਕ ਅੰਤਰਰਾਸ਼ਟਰੀ ਪੱਧਰ ਦੇ ਦਿੱਗਜ ਤੇ ਵੱਡੇ ਪਰਉਪਕਾਰੀ ਸਨ। ਉਨ੍ਹਾਂ ਨੇ ਸੰਯੁਕਤ ਰਾਸ਼ਟਰ ਫਾਊਂਡੇਸ਼ਨ ਦੀ ਸਥਾਪਨਾ ਕੀਤੀ ਅਤੇ ਦੁਨੀਆ ਭਰ ਵਿੱਚੋਂ ਪ੍ਰਮਾਣੂ ਹਥਿਆਰਾਂ ਦੇ ਖਾਤਮੇ ਲਈ ਸਰਗਰਮ ਰਹੇ। ਵਾਤਾਵਰਣ ਪ੍ਰਤੀ ਪਿਆਰ ਕਾਰਨ ਉਨ੍ਹਾਂ ਨੇ ਬੱਚਿਆਂ ਨੂੰ ਸਿੱਖਿਅਤ ਕਰਨ ਲਈ ‘ਕੈਪਟਨ ਪਲੈਨੇਟ’ ਕਾਰਟੂਨ ਤਿਆਰ ਕੀਤਾ ਅਤੇ ਅਮਰੀਕਾ ਵਿੱਚ ਬਾਇਸਨ (ਜੰਗਲੀ ਝੋਟੇ) ਦੀ ਨਸਲ ਨੂੰ ਮੁੜ ਸੁਰਜੀਤ ਕਰਨ ਵਿੱਚ ਅਹਿਮ ਭੂਮਿਕਾ ਨਿਭਾਈ।
ਟੈੱਡ ਟਰਨਰ ਪਿਛਲੇ ਕੁਝ ਸਮੇਂ ਤੋਂ ਸਿਹਤ ਸਬੰਧੀ ਮੁਸ਼ਕਲਾਂ ਦਾ ਸਾਹਮਣਾ ਕਰ ਰਹੇ ਸਨ। 2018 ਵਿੱਚ ਉਨ੍ਹਾਂ ਨੇ ਖੁਲਾਸਾ ਕੀਤਾ ਸੀ ਕਿ ਉਹ ‘ਲੂਈ ਬਾਡੀ ਡਿਮੈਂਸ਼ੀਆ’ ਨਾਂਅ ਦੀ ਦਿਮਾਗੀ ਬਿਮਾਰੀ ਤੋਂ ਪੀੜਤ ਹਨ। ਸਾਲ 2025 ਦੇ ਸ਼ੁਰੂ ਵਿੱਚ ਉਨ੍ਹਾਂ ਨੂੰ ਨਿਮੋਨੀਆ ਕਾਰਨ ਹਸਪਤਾਲ ਵਿੱਚ ਵੀ ਭਰਤੀ ਕਰਵਾਉਣਾ ਪਿਆ ਸੀ।
ਸੀ.ਐਨ.ਐਨ. ਵਰਲਡ ਵਾਈਡ ਦੇ ਚੇਅਰਮੈਨ ਮਾਰਕ ਥੌਮਸਨ ਨੇ ਉਨ੍ਹਾਂ ਨੂੰ ਸ਼ਰਧਾਂਜਲੀ ਦਿੰਦੇ ਹੋਏ ਕਿਹਾ, ‘ਟੈੱਡ ਇੱਕ ਨਿਡਰ ਆਗੂ ਸਨ ਅਤੇ ਉਹ ਹਮੇਸ਼ਾ ਸੀ.ਐਨ.ਐਨ. ਦੀ ਰੂਹ ਵਜੋਂ ਯਾਦ ਕੀਤੇ ਜਾਣਗੇ। ਉਹ ਇੱਕ ਅਜਿਹੇ ਮਹਾਨ ਵਿਅਕਤੀ ਸਨ ਜਿਨ੍ਹਾਂ ਦੇ ਮੋਢਿਆਂ ’ਤੇ ਅਸੀਂ ਸਾਰੇ ਖੜ੍ਹੇ ਹਾਂ।’
