ਮੋਹਾਲੀ/ਏ.ਟੀ.ਨਿਊਜ਼: ਖਰੜ ਵਿੱਚ ਨਿਤਿਨ ਗੋਹਲ ਦੇ ਫਲੈਟ ’ਤੇ ਐਨਫੋਰਸਮੈਂਟ ਡਾਇਰੈਕਟੋਰੇਟ ਦੀ ਟੀਮ ਵੱਲੋਂ ਛਾਪੇਮਾਰੀ ਕੀਤੇ ਜਾਣ ਦੇ 24 ਘੰਟਿਆਂ ਤੋਂ ਵੱਧ ਸਮਾਂ ਬੀਤ ਜਾਣ ਤੋਂ ਬਾਅਦ ਵੀ ਟੀਮ ਅਜੇ ਵੀ ਫਲੈਟ ਦੇ ਅੰਦਰ ਮੌਜੂਦ ਹੈ। ਗੋਹਲ ਦੇ ਬੱਚਿਆਂ ਨੂੰ ਵੀਰਵਾਰ ਨੂੰ ਇੱਕ ਅਧਿਕਾਰੀ ਵੱਲੋਂ ਸਕੂਲ ਛੱਡਿਆ ਗਿਆ ਸੀ।
ਵੀਰਵਾਰ ਤੋਂ ਅਧਿਕਾਰੀ ਵਾਰੀ-ਵਾਰੀ ਛੋਟੀਆਂ ਬਰੇਕਾਂ ਲੈ ਰਹੇ ਹਨ। ਹਾਊਸਿੰਗ ਸੁਸਾਇਟੀ ਵਿੱਚ ਸੀ ਆਰ ਪੀ ਐੱਫ ਦਾ ਘੇਰਾ ਪਾਇਆ ਹੋਇਆ ਹੈ। ਧੀਰ ਕੰਸਟਰੱਕਸ਼ਨ ਦੇ ਟਿਕਾਣਿਆਂ ’ਤੇ ਵੀ ਛਾਪੇਮਾਰੀ ਜਾਰੀ ਹੈ।
ਈ.ਡੀ. ਨੇ ਜ਼ਮੀਨ ਦੀ ਵਰਤੋਂ ਦੇ ਨਿਯਮਾਂ ਵਿੱਚ ਕਥਿਤ ਧੋਖਾਧੜੀ ਨਾਲ ਬਦਲਾਅ ਅਤੇ ਜ਼ਮੀਨ ਮਾਲਕਾਂ ਤੇ ਘਰ ਖਰੀਦਣ ਵਾਲਿਆਂ ਨਾਲ ਧੋਖਾਧੜੀ ਦੇ ਸਬੰਧ ਵਿੱਚ ਪੰਜਾਬ ਦੇ ਦੋ ਰੀਅਲ ਅਸਟੇਟ ਗਰੁੱਪਾਂ ਵਿਰੁੱਧ ਤਲਾਸ਼ੀ ਅਤੇ ਜ਼ਬਤੀ ਦੀ ਕਾਰਵਾਈ ਕੀਤੀ, ਜਿਸ ਦੌਰਾਨ ਖਰੜ ਵਿੱਚ ਡਰਾਮਾਈ ਦਿ੍ਰਸ਼ ਦੇਖਣ ਨੂੰ ਮਿਲੇ ਜਿੱਥੇ ਛਾਪੇਮਾਰੀ ਦੌਰਾਨ ਇੱਕ ਫਲੈਟ ਵਿੱਚੋਂ ਨਕਦੀ ਦੇ ਬੰਡਲ ਸੁੱਟੇ ਗਏ ਸਨ।
ਦਿੱਲੀ ਵਿੱਚ ਈ.ਡੀ. ਦੇ ਸੂਤਰਾਂ ਨੇ ਦੱਸਿਆ ਕਿ ਇਹ ਛਾਪੇਮਾਰੀ ਛੱਜੂ ਮਾਜਰਾ ਸਥਿਤ ਵੈਸਟਰਨ ਟਾਵਰਜ਼ ਦੇ ਫਲੈਟ ਨੰਬਰ 906 ਵਿੱਚ ਕੀਤੀ ਗਈ ਸੀ। ਤਲਾਸ਼ੀ ਮੁਹਿੰਮ ਦੌਰਾਨ ਕਥਿਤ ਤੌਰ ’ਤੇ ਨਕਦੀ ਦੇ ਬੰਡਲਾਂ ਵਾਲੇ ਦੋ ਬੈਗ ਬਿਲਡਿੰਗ ਦੇ ਅੰਦਰੋਂ ਬਾਹਰ ਸੁੱਟੇ ਗਏ ਸਨ।
ਈ.ਡੀ. ਸੂਤਰਾਂ ਨੇ ਅੱਗੇ ਦੱਸਿਆ ਕਿ ਮੋਹਾਲੀ ਅਤੇ ਚੰਡੀਗੜ੍ਹ ਵਿੱਚ 12 ਟਿਕਾਣਿਆਂ ’ਤੇ ਛਾਪੇਮਾਰੀ ਕੀਤੀ ਗਈ, ਜਿਸ ਵਿੱਚ ਕਈ ਬਿਲਡਰਾਂ ਅਤੇ ਹਾਊਸਿੰਗ ਪ੍ਰੋਜੈਕਟਾਂ ਦੇ ਨਾਲ-ਨਾਲ ਨਿਤਿਨ ਗੋਹਲ ਦੇ ਟਿਕਾਣੇ ਵੀ ਸ਼ਾਮਲ ਹਨ, ਜੋ ਕਥਿਤ ਤੌਰ ’ਤੇ ਇੱਕ ਸੀਨੀਅਰ ਸਰਕਾਰੀ ਅਧਿਕਾਰੀ ਦੇ ਓ.ਐਸ.ਡੀ. ਦਾ ਕਰੀਬੀ ਦੱਸਿਆ ਜਾਂਦਾ ਹੈ।
